Cooperacion ta central durante su bishita na Aruba
*Tambe lo discuti e supervision di frontera
ORANJESTAD (AAN): Secretario di Estado di Husticia y Seguridad, Eric van der Burg, ta realisa un bishita di trabou di cuater dia na e parti Caribense di Reino. Di 22 di oktober te cu 25 di oktober e ta bishita seguidamente Aruba, Corsou y Boneiro.
Pa medio di combersacionnan cu colaboradornan, organisacionnan y diferente bishita di trabou lo informa e secretario di estado di e maneho di imigracion, di e forma con ta atende cu trato y contrabanda di hende y cu maneho fronteriso riba e islanan.
Proposito di e bishita ta pa keda na altura di e situacion actual y di e problematicanan di imigracion riba e islanan.
Cooperacion ta central durante su bishita na Aruba. Por ehempel riba tereno di implementacion di e Ley di Reino tocante Nacionalidad Hulandes, riba tereno di cooperacion entre autoridadnan fronteriso y a traves di ponemento di enfoke riba posibel optimalisacionnan den e cadena di imigracion. Tambe lo discuti e supervision di frontera.
E bishita ta continua na Corsou unda lo mantene e secretario di estado na altura di e maneho di immigracion y e forma con ta atende cu trato y contrabanda di hende. Tambe lo tene combersacionnan cu organisacionnan no-gubernamental, wardacosta y Koninklijke Marechaussee.
Na Boneiro e secretario di estado ta cuminsa su bishita cu un combersacion cu colaboradornan di e cadena di immigracion. Aki tambe palabracionnan tocante trato
y contrabanda di sernan humano y control di frontera ta riba e programa. Ademas lo discuti detencion di stranheronan y e secretario di estado ta papia cu colegio ehecutivo. Ta conclui e bishita na e islanan cu apertura di e conferencia anual di leynan di imigracion.
