Un yamada pa scucha y tuma accion pa naturalesa

Naturalesa ta Papia:

ORANJESTAD (AAN): Riba Dia di Mama Tera, Aruba Conservation Foundation (ACF) ta invita Aruba completo pa tuma un momento pa refleha riba un mensahe simpel pero urgente: si naturalesa por a papia, kico e lo ta bisando, y e ta wordo scucha di berdad?

   Cu e lansamento di e campaña di conscientisacion Naturalesa ta Papia, ACF ta presenta un mensahe cu ta trece e comunidad mas cerca di e mundo natural di Aruba, pa e wordo admira, wordo compronde, y pa wordo proteha. E mensahe tin como meta pa incentiva e audiencia pa tuma un momento pa refleha riba kico naturalesa ta bisando  y pensa riba ki accion mester tuma pa proteh’e.

   E mensahe ta presenta su mes den tres acto. E ta cuminsa cu hiba e audiencia pa wak Aruba su paisahe y especienan di cerca, revelando e bunitesa y detayenan chikito cu hopi biaha ta keda sin wordo mira y asina conecta cu naturalesa. Siguientemente, e escena ta transiciona pa mustra e realidad di menazanan creciente riba e isla su medio ambiente y impactonan humano riba su ecosistema fragil. Den e ultimo acto,  ta recorda cu tin speranza, asina resaltando e esfuersonan colectivo di un comunidad cu tin di tuma accion hunto pa proteha, preserva, y restaura Aruba su naturalesa.

   Filma na Aruba durante un periodo di 2 luna, e produccion akinan a wordo traha cu un compromiso profundo y respetando naturalesa. Tur imagen a wordo captura di un distancia respetoso y bou di guia di expertonan pa sigura cu no tin disturbio na ningun especie of habitat.

   “E mensahe di conscientisacion aki ta funcciona como un vehiculo pa nos para keto, y refleha kico naturalesa ta purbando di bisa nos”, ta comenta Tyson Lopez, Director General, Aruba Conservation Foundation. “Naturalesa semper ta comunica cu nos a traves di su bunitesa, su cambionan, su resiliencia, y hasta ora e ta bou presion. Pero awo, ta e momento pa nos haci mas cu solamente djis scucha. Nos mester compromete na tuma accion colectivo pa asina garantisa cu e futuro generacion por disfruta di un miho medio ambiente.”

Aruba su areanan natural mas y mas ta bou presion profundo. Di areanan terestre, costanan y  awanan, e manera cu nos ta comporta nos mes den naturalesa ta afecta su futuro y nos futuro directamente. Naturalesa ta Papia y ta haci un  yamada pa un cambio di comportacion, pa sosten y aprecio pasivo pa tuma responsabilidad activo.

   Scucha naturalesa papia no ta solamente un sentimento y un conexion. E mester wordo refleha den nos escogencianan diario door di move cu cautela, respeta barera, proteha habitatnan y scoge concientemente pa reduci impacto riba e lugar cu ta nos hogar.

   ACF ta enfatisa cu conservacion no por wordo logra door di un grupo di persona so. Conservacion di Aruba su herencia natural ta rekeri accion colectivo di yiunan di tera, residentenan, bishitante, socionan, gobernantenan y henter nos comunidad.

   Riba Dia di Mama Tera, Naturalesa ta Papia ta e yamada pa scucha cu intencion y berdaderamente compromete na naturalesa su proteccion.

   Naturalesa ta papiando caba, locual cu ta bin despues ta con Aruba, como comunidad ta dicidi di responde.

   Pa conoce mas di e campana di Naturalesa ta Papia, por bishita e website:

acf.aw/naturalesa-ta-papia