Varios studiante di Colegio Arubano a conoce Aruba mas di cerca

ORANJESTAD (AAN): Durante luna di April aki, ta conoci cu un grupo grandi di nos alumnonan di Havo-4 y VWO-5 a bishita Hulanda y Curaçao,

tambe tabata tin studiantenan cu kier a siña mas di e isla aki mes durante e periodo ey. Pa nan, a organisa un projectweek special na Aruba, yen di experiencia y creatividad.

     Dia 1: A bay haci Aruba Mural Tours.  E studiantenan a bay San Nicolas pa mira e murayanan pinta pa algun artista local y internacional. Tambe nan a bishita ArtisA, unda nan a admira obranan di arte manera cuadra pinta, artesania y hopi mas.

   Un palabra di danki ta bay na Sr. Tito Bolivar di ArtisA pa e informacion valioso cu el a comparti cu nos studiantenan.

   Dia 2 tabatin Caminata den Arikok National Park: E studiantenan a haci un caminata bou di guia di seis park ranger. Nan a ricibi informacion interesante tocante historia di Aruba, e minanan di oro y e diferente paisahenan natural.

   Dia 3 a bay haci bishita na Aruba Aloe Factory. E studiantenan a haci un recorido den Aruba Aloe Factory Museum y despues nan a participa den un tayer creativo pa traha nan propio scrub. Nan a traha scrub di coco, canela y avena.

   Un siman yen di creatividad y experiencia nobo pa e studiantenan.  E potretnan pa cortesia di Colegio Arubano.