Un total di 9 bus Minister Andin Bikker a entrega pa uzo di KIA 

ORANJESTAD (AAN): Durante un ceremonia cortico na Garage Centraal, Minister di Husticia, Siguridad y Integracion, mr. Andin Bikker,

a efectua entrega na director di KIA, sr. Gino Winklaar, di un total di nuebe bus specialisa.

            E busnan a wordo tuma over di departamentonan di husticia di Hulanda, den cuadro di cooperacion den Reino Hulandes. Ta trata aki di nuebe bus di marca Volkswagen. Ministerio di Husticia di Aruba a cubri e gastonan di transporte for di Hulanda pa Aruba y pa Garage Centraal por a drecha nan y prepara nan pa algun aña mas di servicio.

            Un di nan ta un bus cu ta carga 8 pasahero, cu ta destina pa uza na Dienst Gevangeniswezen Opleidingsinstituut pa por transporta aspirantnan pa nan trainingnan durante nan opleiding pa bira cuidado di preso. E otro ocho busnan ta pa uzo di e ekipo di K-9 di KIA y nan tur ta ekipa cu hermentnan di K-9 di Hulanda. 

            E vehiculonan aki ta bonbini y necesario pa e bon funcionamento di Korrectie Instuut Aruba (KIA). Na april ultimo a caba di logra uniform nobo y ekipo di trabou pa e Interne Bijstandsteam (IBT) y e Bijzondere Ondersteuningsteam (BOT K-9 unit). Awor ta asina leu cu nan a haya mas medio di transportacion. A logra tambe pa keda cla cu un decreto y formatieplan nobo cual lo bay wordo implementa hunto cu DRH y asina por atende cu promocionnan y rechtspositie cu ta pendiente desde di prome cu e gabinete actual. 

            Minister Andin Bikker a desea tur e aspirantnan presente cu ta studiando pa bira cuidado di preso di KIA, hopi exito. Ademas e ta contento di por a logra percura pa inversion adicional den drecha e infrastructura di e edificio, cu el a hereda den un mal estado. No a inverti solamente den edificio, sino tambe por ehempel a percura pa sistema di computer y comunicacion nobo y tambe cursonan special pa e empleadonan, pa por capacita nan miho y actualisa nan conocemento den maneho di preso y asina garantisa un miho reintegracion di e presonan despues den comunidad.  

            Minister Andin Bikker a nombra un director permanente nobo, sr. Gino Winklaar, despues di un proceso di reclutacion. A percura pa gruponan nobo di cuidado di preso por start nan estudio. Cu esey ta garantisa cu ta haya hobennan bon entrena pa cuminsa haci e trabou di cuidado di preso. Esey ta necesario pasobra anualmente tin cuidadonan di preso cu ta baha cu pensioen of ta stop di traha. Pa bira cuidado di preso ta rekeri un estudio, mescos cu ora kier bira polis, bombero of duanero. Ta despues di algun luna di les, ta cuminsa core stage den prizon y despues cuminsa traha den forma oficial. 

            Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues 31 aña pasa. E prizon tin un populacion di un maximo di 300 detenido, parti den detencion preventivo, seccion di hende muhe y seccion di hubentud. Na KIA tin un gran cantidad di empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.