Un total di 8 mama hoben a gradua na Aruba Adventist Academy como ‘Life Coach’

ORANJESTAD(AAN): Diamars atardi a tuma lugar un ceremonia special pa 8 mama hoben cu a gradua como Life Coach cerca Aruba Adventist Academy.

MC di e ceremonia Angelique Sambo a cuminza na gradici e comision di ADRA cu na un manera incansable a guia e hobennan.

Tambe a gradici Yvonne Geerman, coordinador di Centro Hoben y Famia, como tambe  Monique Giel coordinador di departamento Tiener Moeders di Wit Gele Kruis, Willem Seferina, Jeanmiree van der Werf di Fundacion Respetami, Hanna Harsveld y Rachelle Gibbs di Departamento di Asuntonan Social y Centro pa Hoben y Famia y señora Lacle di Comision Voortgezet Ouderschap di Departamento di Husticia, como tambe e diferente sponsornan.

Despues cu e 8 graduadonan Martha, Kristal, Sheyla, Jomall, Ruth, Mariana, Marjorie y Stephany a drenta e sala, vice presidente di Fundacion ADRA Mirugia Locadia Vink a splica cu e fundacion ta e agencia humanitario di Iglesia Adventista di 7 dia.

E ta forma parti di un red internacional cu ta enfoca riba desaroyo di e potencial humano, pa duna hermentnan pa sali for di nivel di pobreza y desventaha.

E mamanan hoben di cual algun tin mas cu 1 yiu a haya cursonan di entre otro cosemento, administracion basico, obranan di man, salud mental, cushinamento, protocol di etiquette y mas.

ADRA ta sali for di e punto di bista tambe cu e hecho cu e muchanan muher a bira mama hoben no mester stroba nan di haya un di dos oportunidad pa bay dilanti den nos comunidad, banda di e hecho di ta mama.

ADRA ta brinda e oportunidad pa e muchanan muher bin cu nan yiunan cu lo wordo cuida, mientras cu nan ta haya e cursonan ofreci.

Durante e ceremonia, cada un di e mamanan hoben a conta di nan experiencia pa loke ta e cursonan pa cual nan a gradua y asina a stimula tambe otronan pa sigui e guia di ADRA.