ORANJESTAD (AAN): Landamento Escolar ta un programa di Departamento di Enseñansa Aruba (DEA) den cual muchanan di scol ta haya instruccion di landamento durante orario di scol.
E programa, cu ta financia door di Gobierno di Aruba, ta existi ya pa 28 aña.
Actualmente ta duna e lesnan di landamento escolar na alumnonan di klas 3 di Scol Basico y Special na Aruba.
Desde 28 di juni te cu 2 di juli 2021 e muchanan cu ta cla pa esaki ta haciendo nan examen di Landamento Escolar.
Un di e exigencia di examen pa diploma A y B di Arubaanse Zwem Bond ta: landa cu paña. Esaki kiermen cu riba nan ‘zwempak/broek’ mester bisti: T-shirt, short y keds. Nos ta pidi cooperacion pa usa paña cu no ta hopi pisa, por ehempel no bisti jeans. E sapato cu ta usa mester ta cera. No ta permiti sandalia ni tampoco ‘sapato di lama’.
E examen ta tuma luga na Piscina Olimpico Roly Bisslik na Savaneta y ta bou auspicio di Consul y Examinator di Arubaanse Zwem Bond.
Mayornan ta bonbini
Mayornan ta bonbini pa presencia examen. Pa medio di esaki ta invita tur mayor pa bin apoya nan yiu riba dia di nan examen. Check cu scol pa e dia y ora cu bo yiu tin examen. Por haya e informacion aki tambe riba website www.ea.aw.
Exito na tur mucha cu ta bay pasa nan examen.
