Un total di 30 participante ya a confirma cu nan tey pa Aruba College Fair 2026

Dianan 13 y 14 di otro luna

ORANJESTAD (AAN): Scoge un estudio of un carera ta cuminsa cu conoce bo posibilidadnan. Cu e mensahe central “Where dreams find direction”, Aruba College Fair 2026 lo tuma luga diabierna 13 y diasabra 14 di november na Renaissance Convention Center na Oranjestad. E feria lo reuni institucionnan di enseñansa y companianan pa yuda bishitantenan explora nan opcionnan, haya contesta na nan preguntanan y duna direccion na nan futuro.

   E orario ta di 1 or di merdia pa 7’or di anochi ambos dia y registracion pa studiantenan y demas bishitantenan ta habri den luna di october 2026. Entrada ta 5 Florin pa esnan registra di antemano y 10 Florin na porta.

   Actualmente, 30 participante ta confirma, cu representacion di Aruba, Caribe, Norte y Centro America, y Europa. E evento ta bonbini tur hende interesa den informacion tocante estudio despues di enseñansa secundario y posibilidadnan di carera, incluyendo studiantenan, mayornan, educadornan y adultonan cu ta considera un siguiente paso den nan desaroyo profesional.

   Segun presidente di e fundacion organizador, Muzaninn Wever, e contacto personal ta sigui ta e gran balor di Aruba College Fair, tambe den un era cu informacion digital ta ampliamente disponibel.

“Lesa un website of un folder por laga un studiante of mayor cu pregunta. E oportunidad pa puntra, haya contesta y sigui profundisa riba esaki ta duna e feria hopi balor,” Wever ta splica.

    Explora mas cu e opcionnan conoci: Aruba College Fair a cuminsa na aña 2000 y a tuma luga cada dos aña. Despues di edicionnan virtual na 2020 y 2021, e feria a retoma su formato presencial na 2022.

Pa e edicion di 2026, e organizacion ta spera entre 2.500 y 3.000 bishitante. Entre e participantenan nobo tin Southern Alberta Institute of Technology di Canada y Erasmus University College di Rotterdam. Tambe Ernst & Young y Hyatt ta incorpora como participante nobo. Universidad di Aruba lo ta presente cu un participacion mas amplio cu nunca, destacando oportunidadnan pa sigui studia na cas.

   Wever ta anima studiantenan pa acerca e feria cu mente habri y explora mas cu solamente e estudionan cu nan conoce caba. E ta recomenda pa reflexiona riba nan interesnan, capacidadnan y e tipo di bida profesional cu nan kier construi.

   Pa esnan cu kier regresa Aruba despues di nan estudio, e feria ta ofrece un oportunidad pa investiga con un programa di estudio por conecta cu oportunidadnan di trabao na isla, of cu un necesidad den mercado cu por habri porta pa emprendemento.

   Financiamento y preparacion pa bida estudiantil: Ademas di contacto directo cu e participantenan, e programa lo inclui sesionnan y presentacionnan informativo. Departamento di Studiefaciliteiten di Aruba y DUO di Hulanda lo brinda informacion tocante nan respectivo posibilidadnan di financiamento di estudio. EducationUSA lo informa tocante e proceso pa aplica pa un visa di studiante pa studia na Merca.

Institucionnan participante tambe lo por splica nan oferta di beca, descuento y tarifanan special, incluyendo posibilidadnan di in-state tuition. E organizacion ta recomenda bishitantenan pa puntra cada institucion directamente tocante e opcionnan y condicionnan cu ta aplica.

   E programa ta contempla tambe orientacion tocante studia na Hulanda y maneho di un presupuesto como studiante. Otro sesionnan ta pendiente di confirmacion.

   Durante e feria, institucionnan lo splica nan proceduranan di admision, periodonan di aplicacion y fechanan limite, pa studiantenan por prepara nan siguiente pasonan cu tempo.

   Bin prepara, sali cu mas claridad: Pa saca e maximo beneficio for di e feria, e organizacion ta recomenda bishitantenan pa prepara nan preguntanan di antemano. Fuera di contenido di e estudio, ta importante pa informa tocante vivienda, costo di bida, becanan, deporte, arte y posibilidadnan pa traha durante estudio.

   Un test di orientacion profesional, un combersacion cu un decaan of guia di estudio, y un revision di e oferta di e institucionnan participante por yuda studiantenan haci preguntanan mas specifico durante nan bishita.

Na esnan cu ainda no ta sigur di nan futuro, of cu ta pensa cu sigui studia no ta un posibilidad pa nan, Wever ta recorda cu preparacion pa un carera por tuma diferente forma. Esaki ta inclui tambe trayectonan di formacion profesional, manera esun di Kustwacht.

   “No laga duda of incertidumbre di awe limita bo oportunidadnan di mayan. Bin wak kico tin, puntra kico ta posibel y despues tuma bo decision,” e ta expresa.

   Aruba College Fair 2026 ta conta cu sosten di Setar, Stimuleringsfonds, Masy-Fral, Kiwanis Palm Beach y Convention Center.  E invitacion na comunidad ta pa reserva 13 y 14 di november pa explora posibilidadnan y combersa directamente cu esnan cu por brinda orientacion pa e siguiente paso. “Bin cu mente habri pa haya e informacion cu por yuda bo tuma e decision cu ta pas cu bo estudio y bo futuro,” Wever ta conclui.