Ministro Dowers a ricibi resultado di investigacion haci riba gambling na Aruba

ORANJESTAD (AAN): Recientemente Minister di Husticia, Integracion, Transporte Publico y Energia, mr. drs. Arthur Dowers,

a ricibi oficialmente e rapport di investigacion independiente tocante participacion di comunidad den weganan di placa na Aruba. E investigacion a ser haci pa e entidad di investigacion RE-Quest Research & Consultancy, den encargo di Ministerio di Asuntonan Interno y Relacionnan den Reino (BZK) y Tijdelijke Werkorganizatie (TWO), den cuadro di Landspakket y den cooperacion estrecho cu Kansspelautoriteit Aruba cu ta den fase avansa di su fundacion.

   E rapport, titula Onderzoek Kansspeldeelname Aruba, ta representa e prome investigacion cientifico di su tipo entre personanan adulto na Aruba. E investigacion ta establece un punto di referencia importante pa haya un miho bista di e manera cu personanan ta participa den gambling, e diferente factornan di riesgo y e consecuencianan cu gambling por tin pa nos comunidad.

   Segun Minister Dowers, e investigacion aki ta un paso importante den e proceso pa fortalece regulacion y supervision di e sector di gambling na Aruba.

   Gambling ta un actividad cu mester ta bon regula y supervisa. E responsabilidad di Gobierno no ta limita solamente na establece regla, pero tambe na proteha nos ciudadanonan contra e riesgonan cu por ta relaciona cu gambling. Pa logra esaki, mester tin informacion confiabel y fundamenta cientificamente, pa asina por tuma decisionnan responsabel y efectivo. 

   Na momento cu aproba e Landsverordening toezicht op kansspelen, e entidad "Kansspelautoriteit" lo haya un responsabilidad amplio den supervision di e sector. Esaki lo inclui otorgamento di permiso, supervision di cumplimento di ley y regulacion, prevencion di labamento di placa y financiamento di terorismo, accion contra actividadnan ilegal di gambling y proteccion di consumido.

   Banda di supervision y aplicacion di ley, prevencion y informacion na comunidad mester ocupa un posicion central den e maneho di gambling.

   Wega di placa por trece consecuencianan negativo pa persona, famia y comunidad. P'esey ta importante pa nos identifica e riesgonan na tempo, fortalece prevencion y sigura cu e consumidor ta debidamente informa. E meta ta pa crea un sector cu ta opera den un manera responsabel, transparente y conforme ley, caminda proteccion di nos comunidad ta central.

   Durante e encuentro, a presenta e resultadonan principal y recomendacionnan di e investigacion na representantenan di e ministerionan concerni, organizacionnan activo den cuido y prevencion, y representantenan di e sector di gambling.

   Minister Dowers ta considera e participacion di e diferente instancianan di gran importancia, mirando cu un enfoke integral y cooperacion structural entre Gobierno, sector di cuido y sector priva ta esencial pa logra un sistema di supervision efectivo.

   E rapport completo, Onderzoek Kansspeldeelname Aruba, ta disponibel digitalmente pa publico via e portal oficial di Gobierno di Aruba, esta www.gobierno.aw