Un total di 10 compania a ricibi certificado di Aruba Certification Program

ORANJESTAD(AAN): Aruba Certification Program (ACF). ta un programa cu a wordo diseña pa mehora e experiencia di e turistanan cu ta bishita Aruba

y e intencion ta pa esnan cu ta traha den mundo di turismo haya sa e informacion corecto tocante nos isla y na mes momento haci e promesa pa semper duna e servicio cu e toke di Zjeito manera nos so por den e region.

Aruba Excellence Foundation(AEF)  tin un parti clave den esaki y Diabierna durante celebracion di 10 aña di existencia di ACF, director di AEF Esther Broeksema a trece dilanti cu ta e programa di certificacion sigur ta algo di nos Arubiano.

“E ta un programa asina importante pa tur hende cu ta participa den dje por haya informacion valioso tocante Aruba”.

Hopi hende a pasa caba door di e programa di certificacion y ainda nos tin e mesun equipo cu ta e motor tras di esaki, segun Broeksema.

Mirando cu e programa tambe a wordo afecta pa e pandemia aña pasa sigur,  AEF a cuminza pensa riba un manera pa asina mes sigui ofrece e programa di certificacion.

“Mesora e team a bin cu e idea pa ofrece e certificacion via Zoom y awor esaki ta bay na otro nivel, pasobra AEF a lanza ACP ‘on demand’, cu ta nifica cu den bo tempo, na bo velocidad y den bo comodidad di cas bo por registra, pasa door di e programa di certificacion y bo por wak cada sesion cu a wordo graba di antemano, segun Broeksema, kende a indica cu bo por ricibi bo certificacion e ora ey online.

Na dado momento a haci entrega na certificadonan di representantenan di diferente compania, pa e empleadonan cu a wordo certifica pa ACP.

Esnan cu a ricibi e certificado ta:

Costa Linda, 123 empleado, Cas di Cultura, 7 empleado, Starbucks 28 empleado, Manchebo Beach Resort & Spa 88 empleado, Aruba International Relocations 7 empleado, Eco Destinations 14 empleado, Fofoti Tours 12 empleado, Jeff Classic Tours 2 empleado, Elements of Aruba 2 empleado y Paradise Beach Villas 56 empleado.

E empleadonan di Aruba Excellence Foundation kendenan a traha duro riba e programa, tambe a ricibi un certificado.