Cu un salario promedio di $12 pa luna - ORANJESTAD (AAN): Un articulo publica pa CNN ta revela e situacion deplorable cu actualmente Venezuela ta pasando aden den tur ambito.
Por ehempel, na Venezuela e famianan mas pober tin mas miedo na hamber cu na Covid-19 of cu na e represion contra opositornan locual ta wordo señala pa organisacionnan internacional manera Nacionnan Uni (ONU).
E realidad na Venezuela, ta bay mas leu ainda. Esaki ta loke ta revela e ultimo Encuesta Nacional riba Condicionnan di Bida (Encovi), realiza pa un ekipo investigador conforma pa academiconan di Universidad Católica Andrés Bello (UCAB) y Universidad Central de Venezuela (UCV).
Segun Encovi 2021, ta mustra un panorama devastador pa loke ta pobresa, desigualdad, trabao y migracion, entre otro problemanan social.
Por ehempel, 94,5% di e poblacion di e pais bisiña ta ubica den algun nivel di pobresa. Esun mas notorio ta e pobresa extremo, den cual por haya 76,6% di e poblacion venezolano.
Na e dato aki por agrega algun mas manera esun di e 'gap' salarial segun genero (hende homber ta gana casi 18% mas cu hende muher) of esun di mester warda mas di 2 ora den promedio pa por cumpra combustibel cu bolivares.
E documento di Encovi, di 70 pagina a inclui den nan investigacion 17.402 hogar entre Februari y April 2021). Esaki ta algun di e datonan mas relevante:
Pobresa y desigualdad
- Casi henter e poblacion na Venezuela ta pober. Na 2021, 94,5% di e habitantenan tabata den algun nivel di pobresa. 76,6% di e poblacion ta biba den pobresa extremo.
- Educacion no ta haci diferencia entre ta of no den situacion di pobresa. “Den promedio e personanan cu no ta den pobresa a studia rond di 11 aña, mientras cu esnan cu ta den pobresa extremo (a studia) algo mas cu 9 aña”, segun Encovi 2021.
- E encuesta 2021 tambe ta remarca e desigualdad di genero, ya cu ta señala cu e ingresonan di hende homber ta 17,7% mas cu hende muher.
Compra di combustibel
- Apesar cu e combustibel na Venezuela ta esun mas barata di mundo, haya gasolin ta un odisea.
- Esnan cu mester a utilisa bolívares pa cumpra combustibel (46,6% di e total) mester a warda 2 ora cu 18 minuut pa adkiri den promedio 15,9 liter. E prijs promedio di e combustibel aki tabata US$ 0,2 pa liter.
- Esnan cu a usa pesos colombiano pa cumpra combustibel (9,8% di e total) mester a warda 49 minuut pa adkiri 62,3 liter na un prijs promedio di US$ 0,3 pa liter.
Educacion
- E grupo entre 3 y 24 aña, ta calcula cu tabata tin rond di 11 miyon persona cu potencial pa inscribi den e ciclo escolar 2020-2021. Sinembargo, solamente 65% por a haci'e, e porcentahe mas abao cu ta wordo registra desde 2018.
- E ciclo escolar 2020-2021 a cuminsa cu e scolnan cera, sin strategianan diferencia pa esnan cu impedimentonan pa participa den lesnan na distancia.
- E grupo di edad di 3 pa 5 aña tin tiki acceso na e educacion inicial: 66% tin cobertura educativo si ta bida den situacion di pobresa, mientras cu e porcentahe ta baha te na 58% si ta biba den pobresa extremo.
- E situacion ta bira mas grave pa e grupo di 18 te cu 24 aña cu kier studia na universidad: 40% di esnan cu no ta pober tin acceso na educacion: 23% di esnan cu ta biba den situacion di pobresa tin acceso na educacion; y apenas 15% di esnan cu ta biba den pobresa extremo tin cobertura educativo.
- Di esnan cu a inscribi den e nivelnan di educacion preescolar, basico y secundario pa e ciclo 2020-2021, 90% mester a haya lesnan na distancia pa motibo di e pandemia.
- Di e total aki, solamente 3% por a haya acceso na educacion via TV y 2% via radio. E forma mas utiliza pa e educacion a distancia tabata e contacto telefonico cu mayornan of studiantenan pa e asignacion di actividadnan, cu 59% di e total.
- Desigualdad di genero den e educacion na distancia: segun Encovi 2021, “e responsabilidad di apoya e yiunan den e realizacion di e tareanan ta cay principalmente riba e mama, 78%, ken ademas mester atende cu e tareanan domestico y extra-domestico”.
Cuminda
- E inseguridad alimenticio ta otro di e problemanan cu ta biba na Venezuela.
- Na 2021, 24,5% di e poblacion na Venezuela tabata den situacion di inseguridad alimenticio severo; 35,2%, den inseguridad alimenticio modera; 34,5%, den inseguridad alimenticio leve; y apenas 5,8% no tabata biba den situacion di inseguridad alimenticio.
