No ta bale la pena traha den Sector Publico ---ORANJESTAD (AAN): E Encuesta Nacional riba Condicionnan di Bida (Encovi) realisa na Venezuela e aña aki a duna di conoce datonan importante relaciona cu e realidad di e pais bisiña.
Den un articulo anterior a menciona algun tema cu a wordo analisa den e encuesta aki.
Awor pa loke ta trabao, salud y migracion, a sali na luz cifranan y datonan significante.
Trabao
- Entre 2014 y 2021, e trabao formal na Venezuela a reduci den casi 22%, locual ta igual na e perdida di 4,4 miyon di trabaonan (70% di sector publico y 30% di sector priva).
- Actualmente, solamente 40% di e poblacion ocupa tin trabao formal. E 60% restante ta trahando den e informalidad unda e pago ta hopi mas.
- Un hende cu ta traha den sector publico ta gana den promedio US$ 12,3 pa luna, mientras cu e personanan cu ta traha pa nan cuenta ta genera US$ 32,8 pa luna. Esnan cu ta gana mas ta esnan cu ta traha den iniciativanan priva: US$ 38,7 dollar pa luna.
- E desigualdad di genero tambe ta notable: 67,1% di e hende muhernan ta inactivo economicamente; pa hende homber, e porcentahe ta baha na 33,3%, segun Encovi 2021.
- Encovi 2021 ta haci enfasis den un dato: e desempleo habri ta di 3,2% na Venezuela, locual ta wordo califica como “sorprendentemente abao. "Na Venezuela no tin caminda pa traha”, a agrega. Esaki ta coincidi cu e e cifra di desempleo desalenta (no ta existi e condicionnan pa motiva e buskeda di trabao), cu ta di 16,6%.
Salud
- 78% di e personanan no a raporta problema algun di salud den e 30 dianan previo na e entrevista di la e encuesta. E porcentahe aki a ‘mehora’ den e Encovi 2021, cu 88%.
- E padecimentonan a reduci producto di e medidanan di confinamento pa e pandemia, pero tambe pa e reduccion di e buskeda di consultanan medico (pa motibo cu a disminui e atencion medico pa e pandemia y na e temor di contagio di covid-19) y e preferencia pa e auto-medicacion.
- Entre esnan cu si a raporta problemanan di salud (12%), esunnan mas frecuente tabata problemanan di tension y di e sistema circulatorio, ademas di tos, verkoud y griep.
Migracion
- Casi 5 miyon venezolano a sali di e pais for di 2015, (Venezuela ta conta cu 28,4 miyon habitante segun datonan di Banco Mundial.
- 51% di esnan cu a sali ta hobennan di 15 pa 29 aña. Si ta tuma na cuenta e grupo di 15 te 49 aña, e porcentahe ta mayor: 90%.
- E razon principal pa bandona Venezuela ta trabao (86%), mientras cu na di dos lugar tin e reunificacion familiar (6%).
- Den e migracion reciente, 30% di esnan cu a sali no tabata tin trabao, e porcentahe aki a baha na 14% un vez cu nan a yega na nan destino actual.
- Encovi 2021 ta indica cu mas di 60% di esnan cu a emigra tin un situacion migratorio estable na nan paisnan di destino. 12% a adkiri ciudadania, ta conta cu un permiso di residencia permanente (16%) of, un permiso temporal (33%)”.
- Tres di cada cinco di e migrantenan reciente ta manda placa of recursonan den especie na nan hogar di origen. E envionan ta wordo haci un of dos biaha pa luna den 57% di e ocasionnan.
Riba potret por mira un grupo di venezolano cu a emigra pa Colombia. Nan ta drenta via e frontera y ta cana miles di kilometer buscando un destino pa biba. Esaki a wordo mira door di periodista di DIARIO mes na Bucaramanga, unda tur dia, miles di venezolano, baby, mucha y adultonan, ta purba di sobrebibi den condicionnan hopi biaha inhumano.
