Un etapa nobo pa Departamento di Asunto Social

ORANJESTAD (AAN): Recientemente a tuma luga mudamento oficial di Departamento di Asunto Social (DAS).

Esaki a sosode den fase, prome fase tabata apertura oficial di e edificio nobo renoba na Caya Ernesto Harms, Playa, sigui pa e segundo fase cu ta mudamento di oficina na Savaneta.

   Directora di Departamento di Asunto Social (DAS) dr. Rosanna van Dijk a indica cu e mudamento aki tin di haber cu e edificio ubica na San Nicolas no tabata adecua mas. E edificio ta den hopi mal estado cu a pone cu mester a actua rapidamente y busca un alternativa.

   Ta papia di un solucion temproral, mirando cu e intencion ta di renoba e edificio na San Nicolas cu despues lo bolbe pasa pa Departamento di Asunto Social. Ehecucion di renobacion ta den man di DOW cu tin planificacion di cuminsa cu renobacion den careda di otro aña.

   Ademas di esaki, DAS a celebra recientemente un logro hopi importante: e certificacion internacional ISO 9001, un standard cu ta reconoce cu e organizacion tin procesonan cla, un sistema di calidad structura y un compromiso firme pa mehoracion continuo. Esaki ta confirma cu servicio social riba Aruba ta sigui elevando su nivel di profesionalismo y transparencia.

   Durante ambos momento, e apertura di Lagoen y e mudamento na Savaneta, Minister di Salubridad, Asuntonan Social, Cuido di Adulto Mayor y Maneho di Adiccion Mervin Wyatt-Ras tabata presente pa brinda sosten. Ta importante pa menciona cu e Minister en cuestion a traha na Departamento di Asunto Social como orthopedagoog, un experiencia cu a fortalece su comprendemento di e area y su compromiso cu bienestar di nos comunidad. Minister ta sumamente orguyoso cu e por a comparti ambos momento cu nan.