Prome Ministro Pisas di Curaçao ta desmenti cu nan ta envolvi den esaki
- BBC News: Fundacion a prepara varios luna na Aruba pa por saca Machado di Venezuela
ORANJESTAD (AAN): E media local Arubanative.com a trece un relato e siman aki, tuma for di BBC News, cu a mustra cu un organizacion yama “Grey Bull Rescue Foundation” a prepara lunanan largo na Aruba rescate di lider di oposicion venezolano, Maria Corina Machado: Nan ta yame “Rescate”, pa saca un ganado premio Nobel scondi for di Venezuela.
Den entrevista cu BBC News transmiti pa mundo henter, e Team di Rescate di Machado a admiti cu nan tabata prepara na Aruba y den Venezuela mes.
E operacion: E operacion di rescate pa saca e lider di oposicion Venezolano y ganado di premio Nobel, María Corina Machado, for di Venezuela a envolve uzo di disfraz, dos boto pasando door di laman bruto y un buelo, segun e homber cu a bisa cu e la lidera esaki a conta BBC News.
Yama “Operation Golden Dynamite” (Operacion Dinamit di Oro), e biahe peligroso tabata frieu, muha y largo - pero e dama “formidabel” Machado no a keha ni un biaha, segun Bryan Stern, un veterano di forzanan special di Merca y fundador di Grey Bull Rescue Foundation.
Lama entre Venezuela y Islanan ABC tabata hopi bruto. Basta preto. Nan a uza flashlight pa comunica. ‘Esaki ta duna hopi miedo, hopi cos por bay robes.’
Apesar di e riesgonan, nada a bay robes. Machado a yega sano y salvo na Oslo, Noruega pa ricibi su Premio Nobel di Paz net prome cu mey anochi diaranson. El a viaha cu un avion priva for di Islanan ABC (cual di nan exactamente) rumbo pa Bangor (estado di Maine) na Merca, y despues di eynan a bula direct pa Oslo, Noruega.
Maria Corina Machado tabata biba scondi den su propio pais desde e eleccionnan ampliamente disputa na Venezuela aña pasa, y no a wordo mira den publico desde januari. Su yiunan adulto, kende e no a mira den dos aña, tabata na Oslo pa ricibie.
Grey Bull ta specialisa den misionnan di rescate y evacuacion, specialmente for di zonanan di conflicto y desaster.
Un representante di e ekipo di Machado a confirma na CBS News, e partner di media Mericano di BBC, cu e organisacion tabata tras di su operacion di rescate.
Sr. Stern a bisa cu Grey Bull tabata trahando riba un presencia den Caribe, incluyendo den Venezuela y e isla bisiña di Aruba, pa lunanan largo pa prepara pa posibel operacionnan na Venezuela. “Nos a bin ta traha infrastructura riba tereno na Venezuela diseña pa saca Americanonan, aliadonan y Britaniconan y otro hende, si acaso guera cuminsa na Venezuela,” el a bisa BBC.
Speculacion a aumenta tocante posibel accion militar di Merca contra Venezuela, despues cu Presidente Mericano Donald Trump a pidi Presidente Maduro pa bandona su cargo, acusando e di manda narcotico y asesino pa Merca.
Sr. Stern a bisa cu e reto den e caso aki tabata pa saca un hende afo cu ta asina conoci manera María Corina Machado – e lider di oposicion di Venezuela y su cara ta conoci pa miyones di hende.
Ningun di e infrastructura cu su firma a construi den e pais,” el a bisa, “tabata ‘diseña pa e di dos persona mas popular den e maldito pais cu un blanco riba su lomba. Ora cu el a drenta den contacto pa prome biaha cu e ekipo di Machado, nan no a revela su identidad na cuminsamento, pero Sr. Stern a bisa cu e por adivina ken e tabata.
Ora nan a tuma contacto cun’e na cuminsamento di december, via un contacto cu tabata conoce e ekipo di Machado, aparentemente esaki tabata e di dos intento pa saca e for di Venezuela, despues cu un prome plan “no a bay bon,” Sr. Stern a bisa.
Dinamit di oro: E operacion a wordo yama “Golden Dynamite” pasobra “Nobel a inventa dinamit” y Machado tabata purba yega Oslo pa acepta e Premio Nobel di Paz.
Cosnan a cana lihe. Sr. Stern a bisa cu el a papia cu e ekipo un diabierna, nan a mobilisa diadomingo, y pa diamars nan mision tabata cla. Su ekipo a explora varios posibilidad pa saca Machado for di e pais, y a dicidi riba un plan cu tabata encera un biahe turbulento via lama. Pa proteha su trabou futuro na Venezuela, Sr. Stern por revela solamente cierto detaye tocante e biahe.
Segun e relato den Arubanative.com, ta via tera a move Machado for di un cas caminda e tabata scondi, pa un punto di recohida pa un boto chikito, cual a hibe afo di costa na un boto un tiki mas grandi caminda el a topa cun’e.
E biahe tabata den “laman masha bruto” cu ola te cu 10 pia (3 meter) den “scuridad total,” el a bisa.
“E biahe no tabata dushi. Tabata hasi frieu, tabata masha muha, nos tur tabata papa muha. E olanan tabata masha bruto, y nos a uza esey na nos bentaha. Nos a hibe tera y caminda su avion tabata, y el a bula pa Noruega.”
Peluca y mas: Durante henter e biahe door di Venezuela, el a agrega cu a tuma varios medida pa sconde y disfrasa cara di Machado, uzando peluca, bril, y cambio cosmetico fini supercial, mescos cu su perfil digital pasobra e ta asina conoci.
“E menasa biometrico ta asina real,” el a nota, agregando cu a tuma medidanan pa sigura cu no por a ‘track e via’ su telefon. El a bisa cu Machado tabata ‘formidabel’ a pesar di e condicionnan, aceptando un sweater pa calor, pero sin pidi pa nada otro. “E tabata papia muha y tabata tembla di frieu y no a keha ni un biaha,” el a hari, reconociendo cu e operacion tabata hopi peligroso pasobra awa no ta ‘pordona’. “Si mi ta stuur un boto y un motor rementa, mi ta landa pa Venezuela.”
Ora a puntr’é con e por garantisa seguridad di e Venezolanonan cu a yuda cu e operacion, Sr. Stern a bisa cu nan a mantene nan identidad secreto y ‘nos (Grey Bull) ta haci hopi operacion di engaño’.
El a bisa cu e operacion tabata financia pa donadornan, y no pa Gobierno di Merca: “Nunca nos a haya un nota di gradicimento di gobierno di Merca, ni un Dollar.” Sr. Stern a bisa cu el a coordina cu algun estado nacional, y cu servicionan di inteligencia i diplomatico di varios pais. Esaki a inclui alerta Merca na un manera “informal”.
Maria Corina Machado a bisa cu e tin intencion di regresa Venezuela, pero Sr. Stern a bisa cu el a conseh’e pa no haci esey. Hopi di esnan cu a yuda no a ni realisa cu nan tabata traha p’e, Sr. Stern a bisa, mientras otronan ta kere cu nan “sa e storia completo”, pero en realidad nan no sa.
Mi a bis’e: “No bay bek. Bo ta un mama. Nos tin mester di bo.” E ta bay haci loke e ta bay haci... Mi ta compronde di con e kier bay bek, pasobra e ta un heroe pa su pueblo. Mi ta desea cu e no bay bek, pero mi tin un presentimento cu e regresa toch.
Reaccion di Pisas: Mientras tanto Prome Ministro Pisas na Curaçao ta wordo bombardea cu pregunta pa check si berdad su Gobierno tabata meti den e operacion secreto aki. Pisas a bisa cu Curaçao a wordo teni completamente fo’i di e operacion secreto aki. E mes no a ni wordo notifica ni di antemano, y tampoco despues di esaki.
Pisas a contact Consulado Mericano directamente cu e pregunta kico exactamente a socede, y si acaso Curaçao a wordo uza como trampolin. Pero e no a haya contesta di Consulado, y Pisas a haya esaki inaceptabel, y cu su Gobierno no tabatin ningun informacion.
Segun Pisas, el a contact autoridadnan Hulandes tambe, incluyendo Asunto di Exteriores y Defensa, pero no a haya ningun informacion concreto. Pasobra ya caba den Parlamento tin pregunta ta wordo haci riba posibel consecuencia pa seguridad y diplomacia pa e isla.
