Turistanan cu Visa credit-card a gasta 163 miyon Dollar na Aruba den di tres cuartal di 2025

A.T.A. ta comparti resultado di november 2025

ORANJESTAD (AAN): Den e di tres kwartaal di 2025, den cual a registra un total di 254,261 VISA "cardholders" di 129 pais, por mira cu nan a gasta mas di USD$163 miyon na Aruba, representando un aumento di 12.3% den total di benta compara cu di tres kwartaal di 2024. E aumento aki ta representa un subida di 12.9% den cantidad di "cardholders" y un crecemento di 15.7% den volumen di transaccion, mientras cu retiro di cash a yega US$15 miyon.

   Gasto pa cada "cardholder" a keda casi igual compara cu mesun temporada den 2024. Restaurants y Dining ta keda como e categoria principal den gasto cu US$48 miyon y un aumento di 16%. E siguiente categoria ta Hotels & Lodging cu US$38 miyon y un aumento di 13.1% cu ta exclui e pago pre-paid prome cu a yega Aruba. Na tercer luga ta Retail cu US$35.5 miyon y un aumento di 10.2%.

    A base di e ultimo forecast, e cantidad di turista pa Aruba lo por mustra un subida di minimo 5% na fin di 2025 (stay-over arrivals), cu tur region mustrando un crecemento compara cu 2024.

   Estadistica actual:  Esaki ta estadística conforme actualisacion den e industria di turismo:  Tin un crecemento di 15.9% den stayover pa november 2025 compara cu november 2024.

   Durante november 2025, Aruba a ricibi un total di 123,831 turista stay-over, representando un crecemento di 15.9% compara cu november 2024. Esaki ta un aumento absoluto significativo. E aumento mas notabel a bini for di mercado Latino Americano, particularmente Argentina y Brasil. For di Norte America, Canada a sigui contribui den e crecemento general.

   Mercadonan:  Esaki ta e mercadonan y participacion di e mercado: Pa november 2025, 75.8% di bishitante a bini for di Norte America, 16.0% for di Latino America, 5.4% for di Europa y 2.9% for di otro region.

   E crecemento sobresaliente for di Latino America ta principalment stimula pa Argentina y Brasil. Aunke Europa a mustra un caida leve, Canada a logra un aumento notabel den yegadanan for di Norte America.

   Short-term Vacation Rentals: A.T.A. ta sigui utiliza e plataforma Lighthouse pa monitorea y analiza e sector di Short-Term Vacation Rentals (STVR)_. Si compara november 2025 cu november 2024, e nivel di ocupacion promedio a subi pa 60%. E ADR (Average Daily Rate) pa november 2025 ta USD $307, mientras cu ingreso total YTD te cu november 2025 ta USD $27.3 miyon, compara cu USD $20.8 miyon na november 2024.