Un empresa lo a hiba Mike Huez pa dos proyecto di casi 700 Miyon

Democracia ta yora ora Mike Eman bay eleccion atrobe sin duna cuenta y razon -  *Trafico pega y situacionnan peligroso pa bida di hende prome cu yobida presenta - *Rapport oficial ta mustra pakico e suma no ta den debe nacional y a keda scondi

ORANJESTAD (AAN) — Historia di Aruba, hancra den rapportnan oficial di Gobierno lo papia di situacionnan di abuso cu Mike Eman a comete contra e pueblo di Aruba durante e tempo cu e tabata Prome Ministro di e pais.

Na 2017 ya Mike Eman a logra bay eleccion sin cu Pueblo tabata na haltura, cu el a laga un cuchio na garganta di e Pueblo. Pio ainda, Mike Eman a logra laga Pueblo paga pa celebracion di su “birthday” na e brug na Spaans Lagoen na 2017.

Na 2018 belasting mester a subi pa por a paga tur placa di e proyectonan PPS pero Mike Eman mes for di 2017 a desaparece. Ora Gobierno Evelyn Wever-Croes hunto cu Hulanda tabata splica Aruba cu mester aumenta belasting, Mike Eman tabata sconde pa Aruba, cu ademas di e pago di e debe nacional, mester paga e suma di 82 Miyon Florin annual pa e proyectonan PPS.

For di 2018, hunto cu expertonan DIARIO a profundiza de e puzzel y desaster financiero cu Mike Eman a laga atras como Prome Ministro, manera e rapportnan financiero oficial di Aruba y di Reino ta mustra.

Semper e pregunta a keda, si a base di e Ley di Contabilidad cu ta contene regla con un gobernante mester atende cu placa di Pueblo, Aruba lo por a hiba Mike Eman Huez a base di e exigencianan cu un empresa priva lo a mantene enfrente di un persona, sigur experto hurista manera Mike Eman ta, como gerente di un empresa priva.

Den e rapportnan oficial, e forma cu e proyectonan a afecta e ciudadano, a bini directamente dilanti pa motibonan cu e instancia financiero mas halto di Aruba mes ta trece dilanti.

Den un rapport special cu a wordo dedica na Watty Vos Boulevard y Green Corridor, e instancia mas halto riba tereno di control financiero di Aruba, cu ta Algemene Rekenkamer Aruba, ta mustra cu ta necesario pa vigila kico a pasa cu sumanan enorme cu Pueblo mester a paga pa loke e no a haya.

Ora vehiculonan ta pega den trafico riba Watty Vos Boulevard cu tur su rotonde pa no papia mes di trampa di tapijt di hierba artificial cu ta haci trafico peligroso, DIARIO ta sigui studia e rapportnan cu ta mustra cu ta hustamente pa coregi trafico, Mike Eman a ciega Aruba cu e dos proyectonan.

Haci trafico mas facil tabata uno di e motibonan pa Mike Eman a bini cu e proyectonan, cu Aruba no por a paga. E motibonan aki no ta valido mas pasobra trafico a bira pio cu nunca, pero tambe Pueblo awor mester paga pa e formula cu Mike Eman a scoge pa, manera e rapportnan ta mustra, tene e peso di e debenan aki scondi pa Pueblo.

For di 2009 Mike a cuminsa aumenta e debe nacional cu casi 100 Miyon. E pakete di proyectonan cu e kier a realisa tabata 1.6 Miljard. Si el a hinca nan den e fondo total cu a bira “debe nacional”, Aruba lo a wordo declara bancarato. Ademas Pueblo lo a core imediatamente cu Mike Eman, cu hasta ora Hulanda a bin actua, a bay hunga wega cu Pueblo di Aruba.

Mike no por a hinca su proyectonan di 1.6 Miljard den debe nacional directo y asina a scoge pa e structura cu ta permiti pa cuminsa paga e debenan aki, despues di tempo.

Na 2017, ora Citgo ya por a wordo gescrap for di lista di proyecto di Aruba cu tabata cay den un bashi economico y financiero total, Mike Eman a invita Pueblo di Aruba pa asisti na e fiesta na brug, sin splica cu awor banda di e aumenta di belasting pa motibo di e debe nacional y su interes cu mester paga, Pueblo mester paga pa e proyectonan di PPS tambe, pasobra e proyectonan a wordo entrega aunke como otro desaster.

Na 2017 Aruba no a ripara kico a pasa pasobra Benny Sevinger y Mike Eman, cu tabata haci y deshaci manera nan tabata kier cu e Fondo di 1.6 Miljard, a sconde e rapport di Algemene Rekenkamer Aruba cu na Maart 2018 a wordo entrega na Prome Ministro Wever-Croes.

Na 2019, tabata Algemene Rekenkamer Aruba mes cu den su rapport ta trece dilanti cuanto placa Pueblo mester paga pero con Pueblo por sufri bou di e peso di e proyectonan no solamente cu pago di loke mester paga pa nan pero tambe situacionnan cu por mira luz.

Awe Mike Eman ta bolbe prepara pa bay eleccion pero te awe e no a splica Pueblo di Aruba kico el a laga atras como herencia di desastre cu hasta ta peligroso pa bida di e Arubiano!