ORANJESTAD (AAN): Desde comienso di luna di mei, Stichting Reclassering en Jeugdbescherming Aruba a lansa un recaudacion di fondo, pa celebra e di 60 aña di existencia di e fundacion.
E fondonan lo wordo uza pa inverti bek den nos comunidad, den forma di laptop (Chromebooks) pa 60 hoben cu ta den necesidad por cuminsa nan estudio na scol secundario na un forma stabil. E meta ta pa logra recauda e suma necesario den 60 dia, cual ta yegando cerca.
Stichting Reclassering en Jeugdbescherming Aruba ta traha cu hoben diariamente y sa cua ta e factornan cu ta bin dilanti hopi y cu por conduci na criminalidad. A base di e informacion y e tendencianan cu Stichting Reclassering en Jeugdbescherming ta acumula di e clientenan y ta mira riba tereno di nan trabow, e ta bira posibel pa identifica unda mester pone mas esfuerzo riba prevencion.
E meta di e recaudacion di fondo aki ta pa yega na e suma necesario pa por empodera esnan cu ta vulnerabel den nos comunidad, prome cu cualkier acto of comportacion contra di ley tuma lugar, pues contribuyendo na prevencion di criminalidad bow di hoben.
E team di Stichting Reclassering en Jeugdbescherming Aruba a dicidi pa no celebra e occasion di nan aniversario den forma di un festividad grandi y, sinembargo, a opta pa inverti e suma disponibel, den e recaudacion di fondo aki.
Un gesto cu ta sumamente di aprecia y ta mustra e amor cu trahadonan social tin pa e bienestar di nos pais. Stichting Reclassering e Jeugdbescherming Aruba kier bisa danki na tur compania y persona cu a contribui na e causa aki te cu awor. E organisacion ta na altura cu nos comunidad no ta pasando den e temporada financiero di mas facil y pesey ta laga e suma di donacion na cada persona pa dicidi. Tambe, ta posible pa donate un laptop of Chrome Book (nobo) na oficina di Stichting Reclassering Aruba na Ponton [Caya Ernesto Petronia 21-c] prome cu dia 7 di juli 2021.
Pa donacion monetario por uza e cuenta bancario di Stichting Reclassering en Jeugdbescherming. Cualkier suma cu bo por aporta, ta bonbini. Pa mas informacion of pregunta, por tuma contacto This email address is being protected from spambots. You need JavaScript enabled to view it.
