E acuerdo di DOW cu CTC pa opera Incinerator ta menos di 100 mil pa luna

Contrario na loke algun politico ta bisando den prensa -  ORANJESTAD (AAN): Declaracion di varios politico ultimo simannan ta encera varios informacion cu no ta corecto! 

Specialmente relaciona cu e Incinerator chikito cu DOW a tuma over for di Serlimar.

   Marlon Croes kende ta director di DOW, a splica cu ora nan a tuma over e Incinerator y e Dryer, e tabata ideal pa kima e slip cu ta wordo produci na e Plantanan di Purificacion, y tambe kima e.o. desperdicio medico como tambe cadaver di animalnan.

   DOW a aplica pa haya permiso cu ta cay bao di e Ley di Molestia (‘hinderverordening’) pa por opera esaki.  Den e proceso cu ta canando pa e Hindervergunning, un dama a entabla un caso sumario.

   Den su sentencia, Huez a impone algun rekesito pa Gobierno por opera e Incinerator.  Por ehemplo tin di pone un bandera ora cu e ta operando, pone tambe un windsock pa por mira di unda e biento ta supla.  Pasobra si e biento ta suplando pa tera, tin di stop e operacion.  Si biento ta bay lama por sigui cu e operacion.  Tambe tin di pone un monitoring system pa vigila emisionnan cu e Incinerator kizas lo por produci.

   Consecuentemente DOW a haci mas inversion pa cumpli cu tur punto den e sentencia.  Den e proceso, a ricibi e Hindervergunning dia 23 di December 2020, y esey kiermeen cu a cumpli cu tur rekesito cu Huez a rekeri, y tambe cumpli cu tur minimo exigencia imponi door di Departamento di Salubridad Publico (DVG), y tambe exigencianan di Directie DNM.  Aki a usa varios exigencia severo cu ta wordo usa na Hulanda y tambe door di EPA na Merca.

   Marlon Croes a keda asombra tambe pa e sumanan halto cu algun politico- y prensa ta publicando relaciona cu e contract cu CTC pa opera e Incinerator.

   El a bisa cu e suma di placa cu DOW a yega na un areglo cu CTC, ta significantemente menos cu e 350.000 Florin pa luna cu tabata wordo menciona ultimo dianan.

   El a confirma cu e suma ta mas abao, y no ta ni pasa 100 mil Florin.

   Segun Croes, nan presupuesto ta calcula pa esey, y e tin bon noticia cu ora cu bay cuminza traha cu e Incinerator, lo bay tin hasta un ‘spaarmento’ den operacion compara cu e sistema anterior.

   Gobierno y DOW a cumpli cu tur rekesito, y nan ta start cu e Incinerator pa finaliza cu e Site Assessment Test.  Marlon Croes a splica cu e ‘Site Assessment Test’ ta un prueba cu ta wordo haci na tur equipo industrial cu ta wordo instala.  Y prome cu e drenta servicio, e tin di cumpli cu tur rekesito y parameter cu e bestek ta describi.  Si e cumpli cune, e ora bo por papia di un ‘Delivery Commissioning’ di un equipo, y e ora numa e por drenta den funcion.

   Riba potret por mira Director Marlon Croes di DOW dunando informe, y tambe Daryl Lue ta mustrando riba e rekesitonan pa por a haya e hindervergunning.