Un cultura bibo pa e generacionnan futuro

La Candelaria y El Chorro de Quevedo

Pa Yorleny Oduber-Quesada

Durante mi participacion na Festival Gabo na Bogotá tabatin e oportunidad pa bishita un di e lugarnan mas emblematico di e ciudad: La Candelaria. E bario historico aki ta e curason cultural y artistico di Bogotá, conoci pa su hanchinan di piedra, casnan colonial cu colornan briyante y muralnan cu ta conta historia, poesia y tambe critica social.

Segun historia, eynan mes na El Chorro de Quevedo tabata e lugar caminda Gonzalo Jiménez de Quesada a funda Bogotá den siglo XVI. E plaza chikito, rondona di cafes, galeria di arte y kioskonan di artesania, ta un punto di encuentro pa tanto local como turista. Ta un luga cu ta sinti mescos cu un biahe bek den tempo, pero cu un bista moderno di e cultura bibo.

La Candelaria no ta solamente un museo habri di historia colonial, sino tambe un centro bohemio. Den su cayanan bo por haya musiconan, pintornan cu ta traha nan obra na bista di hende, y escritornan cu ta skirbi poesia riba e momento. Anochi, su cafeterianan y barnan cultural ta yena cu debate, teatro chikito y presentacionnan musical.

E bario ta atrae turistanan pa su rikesa di museo, teatro y catedralnan, pero mas cu tur cos, pa e atmosfera autentico cu ta mezcla historia cu creacion moderno.

E bishita na La Candelaria tabata mas cu “ban dal un keiro”: tabata un experiencia cu ta conta di e origen, transformacion y alma creativo di Bogotá.

E articulo aki no tin un intencion turistico, e ta un recordatorio. Un pais mester wordo reconoci door di su historia, su hende y esaki tambe por ta e caso di Aruba. Ban balora mas loke ta di nos, dun’e realce y hacie un cultura bibo pa asina e generacionnan futuro tambe por disfruta y siña di dje.