Estudio di Impact Hub a confirma cu...
...pero tambe deficiencia den ‘soft-skills’ manera comunicacion, trabou den team
ORANJESTAD (AAN): E ta un hecho cu e mercado laboral di mundo a cambia drasticamente despues di e pandemia. Antes di COVID-19 ya tabata tin señal di un mercado laboral cu ta evoluciona, pero e pandemia a acelera e cambio manera nunca antes. Aruba no a keda atras y tambe a sinti e impacto fuerte, principalmente den sector di turismo y hospitalidad di cual ta considera e pilar principal di nos economia.
Gremionan y stakeholders a informa regularmente riba e realidad aki. Segun un estudio conduci pa Camara di Comercio di Aruba na 2024, mas cu 75% di e companianan di Aruba a indica cu nan tin dificultad pa haya candidato cu ta cumpli cu e cualificacionnan necesario. E mesun estudio a mustra cu e escasez ta mas grandi den sector tecnico, mantencion, limpiesa, chef, administracion y di benta.
Den comienso di 2025, Impact Hub Aruba a confirma e situacion cu un estudio riba necesidad di mercado laboral. E resultado a revela no solamente un escasez di habilidadnan tecnico, pero tambe deficiencia den ‘soft-skills’ manera comunicacion, trabou den team, adaptabilidad, leadership, y preparacion pa trabou.
Segun e dunadonan di trabou, esaki ta un di e obstaculonan principal cu ta pone hopi vacatura no por wordo yena facilmente, incluso esunnan di nivel basico. Motibo principal cerca companianan ta cu no tin preparacion suficiente pa integracion den e lugar di trabou. E situacion ta surgi di un combinacion di factornan: un forsa laboral den pleno transformacion, ‘vergrijzing’, desbalansa di cualificacion, y e demanda creciente di e sector di turismo. Ta anticipa cu e situacion lo empeora den e añanan cu ta bin.
E cambionan aki ta trece un desbalansa structural entre talentonan disponibel y e necesidad di mercado. Si no atende cu e desbalansa aki, e por crea un impacto negativo cu lo afecta sostenibilidad y stabilidad di economia di nos isla.
Pa yuda soluciona e urgencia aki, Impact Hub Aruba, den colaboracion strategico cu Aruba Hotel & Tourism Association (AHATA), a lansa un programa piloto den un formato acelera, ‘Impact Talent Accelerator’.
E mision di e programa ta pa yuda reenforsa Aruba su forsa laboral cu habilidadnan di siglo 21 cu e mercado laboral ta rekiri, traha riba un mentalidad di adaptabilidad y progreso, stimula un ‘entrepreneurial mindset’ y ‘growth mindset’ den un organisacion pa demostra liderazgo, habilidad di tuma iniciativa, responsabilidad y siña con pa soluciona problema den forma creativo.
Na final di dia cada persona tin derecho di tin un trabou cu proposito y cu ta contribui bek na desaroyo sostenibel di nos isla. E programa no solamente ta yuda esnan sin empleo, sino tambe ta fortalece esnan cu ya ta traha, stimulando nan crecemento personal y profesional.
Pa esnan cu no tin empleo e di dos trayectoria di e programa lo aloca e participante cerca un dunado di trabou pa algun dia den siman como ‘apprenticeship’ di unda por adkiri experencia. Pa tur participante lo haci un evaluacion pa midi progreso y evaluacion final pa determina nivel di preparacion pa traha.
E programa ta culmina cu un evento di “job speed dating” pa (re)conecta participantenan cu companianan cu ta buscando trahador.
E programa ‘Impact Talent Acceleraror’ ta un program di 8 siman, cu ta inclui training, workshops, simulations, y job coaching. E programa ta enfoca riba personanan cu no por haya trabou, hoben profesional, recien graduadonan, adulto mayor, y persona cu kier ‘upskill’ pa crecemento profesional. Pa companianan cu ta activamente busca trahado, e ta duna acceso directo na candidatonan realmente motiva cu a pasa den un preparacion structura cu ta coresponde cu e necesidad di industria.
Ta di remarca cu adicionalmente di duna sosten pa yena vacaturanan actual, Impact Talent Accelerator ta yuda cumpli cu varios SDG, entre nan Educacion di Calidad, Trabou Decente y Crecemento Economico, y Reduci Desigualdad.
Pa economia di Aruba, esaki ta significa no solamente yena vacatura, pero desaroyo di un mercado laboral resistente cu por adapta na e cambio di demanda di industria global.
Pa registra pa ‘Impact Talent’ por bishita impact-talent.net. Pa esnan cu no tin empleo, participacion ta completamente gratis. Como programa piloto, Impact Talent lo opera continuamente basa riba e resultado y e necesidadnan di industria y comunidad.
