Cultura di mantencion ta yuda extende e bida di camindanan mas

Francis Gomez di Afdeling Ontwerp & Planning di DOW

*A corto plazo lo inicia un parti di e mantencion di e camindanan di asfalt 

ORANJESTAD (AAN): Hefe di Afdeling Ontwerp & Planning di Departamento di Obranan Publico (DOW), Francis Gomez, a indica cu nan a traha un grafico cu e ‘Pavement Condition Index (PCI).  El a bisa cu despues cu un caminda ta wordo construi y conforme e añanan ta pasa, door di e volumen di trafico y tambe e tipo di trafico como e circumstancianan climatico, e caminda ta cuminsa deteriora.

            Manera por wak den e grafico adhunto, den e prome añanan e ta cay den ‘Very Good’ loke ta indica cu e caminda tin un bon condicion ainda y segun tempo ta pasa e ta cuminsa deteriora y e liña ta baha bao abao. Eynan tambe ta wak con e comunidad ta cuminsa reacciona ya cu e camindanan ta malo.

            Gomez a splica cu e grafico aki ta bon pa ilustra ya cu for di e prome fase por cuminsa identifica y duna mantenimento preventivo como tambe seya e cracknan cu ta aparece. Si e sigui bay ta bay den otro metodonan preventivo cu ta yuda pa asina por mantene un caminda y extende su bida.

            Banda di esaki el a señala cu esaki ta loke ta wordo haci mundialmente y tin varios metodo di mantencion preventivo. Tambe ta importante pa menciona cu si ta wak e custumber na Aruba ta cu hopi biaha ora cu ta pone asfalt na un caminda nobo e ta dura un promedio di 20 aña y ta haya hopi deterioro como defectonan y ta bay over na tapa e buraconan y e cracknan cu por tin.

            Sinembargo, pocopoco ta bay cuminsa implementa metodonan preventivo nobo y den e caso aki ta esunnan cu aworaki ta tumando luga riba Green Corridor, cu ta e micro-pavement, Gomez a declara.

            “Cada biaha mas mantencion bo haci, vooral esunnan preventivo, bo por extende e bida di e caminda. Akinan tambe e metodonan preventivo tambe ta menos costoso”, el a enfatisa. E cultura di mantencion ta yuda extende e bida di camindanan mas, el a agrega.

            Finalmente, Francis Gomez a bisa cu e proyecto di micro-pavement a inicia riba Green Corridor na luna di Maart. Asina cu DOW haya e aprobacionnan cu falta, a corto plazo lo inicia un parti di e mantencion di e camindanan di asfalt y ta bay uza e metodo di ‘frees y recap’, cual ta wordo aplica na varios caminda caba.