Un brindis pa Sandy Geerman cu a bay goza awo di su pensioen

Trahando 46 aña cu Aruba Bank

ORANJESTAD (AAN): Siman pasa, hopi empleado di Aruba Bank, hunto cu famia y amigonan cerca di Sandy Geerman, a reuni pa un motibo special: Pa celebra Sandy.

   Aunke nan ta poco tristo sabiendo cu nan lo no comparti dianan di trabao cu Sandy mas, nos ta contento y hopi orguyoso di por a comparti tur e añanan di trabao cu Sandy.

   Cu curason yen, nos ta bisa: Ayooo, Sandy, mientras cu e ta bay disfruta di pensioen bon mereci despues di completa un carrera extraordinario di 46 aña na Aruba Bank.

   Sandy a cuminsa su carrera na Aruba Bank: su prome trabao, su unico trabao, y awor tambe su ultimo trabao. Ta poco empleado por bisa esaki, y precisamente pa es motibo nos ta considera Sandy un empleado ehemplar y loyal.

   Dia 18 di November, Sandy a baha for di trapi nan di Hato Branch pa ultimo biaha como empleado. el a sali for di e porta di nos branch lagando atras recuerdonan y experiencianan cu lo keda semper parti di nos historia y di ken nos ta como ekipo.

   Awor e ta cuminsa un capitulo nobo y bunita, un capitulo dedica na su mes, su famia y su nietonan.

   Den nomber di Aruba Bank, nos kier expresa nos mas profundo agradecimento na Sandy pa tur e aña nan di dedicacion, compromiso y amor na su trabao. Nos ta pidi cu Dios sigui bendicion’e cu hopi salud, felicidad y hopi oportunidad pa disfruta su pensioen bon mereci.  Sandy, masha danki pa 46 aña berdaderamente remarcabel.