Jaydienne Loefstop di Funari:
ORANJESTAD (AAN): Diaranson, riba Dia Internacional di Personanan cu Limitacion, Stichting Funari no solamente a brinda un dia extra special na nan clientenan cu limitacion fisico sino nan ta manda un mensahe di conscientisacion na pueblo pa tur ciudadano por sa kico Funari ta haci pa acomoda nan clientenan pa biba un miho bida posibel. Señora Jaydienne Loefstop, Activiteitenbegeleider di Funari, den entrevista riba e dia special aki cu DIARIO, a elabora riba e trabounan cu Funari ta haci.
Mayoria di cliente ta keda so na nan cas, famianan ta traha y nan mes ta limita pa sali for di cas. Funari ta busca nan cu bus pa saca nan di e ambiente di ta nan so na cas. Pa envolucra nan mas den comunidad, Funari ta organisa diferente actividad pa anima y stimula nan clientenan, di salida social te na wak luz den e temporada di fin di aña. Den e rutina semanal, Funari ta hiba nan clientenan haci compras y participa den diferente evento cu ta duna nan un sentimento di pertenencia.
Actualmente Funari tin 27 clientenan activo. Algun ta bishita Funari un of dos biaha pa siman, otronan ta yega tur dia. Mayoria ta den rolstoel, algun ta uza baston, y hopi di nan movilidad ta depende di un tercero.
E retonan di mas grandi segun señora Loefstop, ta infrastructura. Nan ta limita pa drenta den mayoria edificio, entre otro supermercado y departamentonan di Gobierno. Hopi caminda no tin rampa y otro unda cu e rampanan ta mucho stijl cu ta haci dificil pa nan y mester ayudo di boluntarionan.
“Awe riba Dia Internacional di Personanan cu Limitacion, mi kier trece na atencion di pueblo, cu e personanan aki ta hende mescos cu nos y nan por haci tur cos. Pero tin cosnan cu mester adapta pa facilita nan bida”, señora Loefstop a enfatisa.
