Un boluntario ta relata con e ta pasa su dia na e Hospice

Hospice Atardi felicitando tur hende cu ta duna cuido paliativo

ORANJESTAD (AAN): Riba Dia International di Cuido Paliativo ta celebra y apoya cuido paliativo y hospice-care rond di mundo.

   Ta pone enfasis riba e importancia di cuido paliativo pa e calidad di bida. Pa esnan na Hospice Atardi, e ta un oportunidad tambe pa pone enfasis riba e parti crucial cu e Hospice-team tin den e cuido pa nos huespednan y nan famia.

   Un palabra suave, yuda cu su higiena personal, un gesto amabel, resa hunto, canta hunto, y scucha, principalmente scucha; berdad, e cuido duna aki ta impagabel!

    Esnan di Hospice Atardi kier felicita y gradici tur hende cu ta duna cuido paliativo!  Pabien y hopi danki pa e bunita trabao aki.

   Un relato special: Un di e boluntarionan a skirbi su storia hunto cu e potretnan aki.

   Kico ta pa traha como boluntario na Hospice Atardi:  Mi ta un pensionado pa algun aña caba. Mi tin diferente cos ta haci cu ta yena mi dianan. Ta cosnan cu mi ta gusta y haya placer fo’i nan. Pa menciona algun: mi ta haci diferente deporte riba dianan fiho, haci trabao den cura, bishita famia y haci wega (boardgames/gezelschapspelletjes), duna tin biaha guia na hende (scriptie of coaching). Y toch... Despues di tempo, mi a cuminsa sinti falta di algo. Mi a papia cu diferente hende djies pa mi haya idea kico tabata haci falta.

   E combersacionnan ey a hibami na e conclusion cu e mester ta un actividad cu ta envolvi traha cu hende. Manera nan ta bisa: ‘casualidad no ta existi. Si un cos ta pa pasa e ta pasa’.

   Wel, na un encuentro cu amistades, mi a bin topa cu un persona asocia na Hospice Atardi y mi a menciona cu mi ta buscando algo cu lo duna mi satisfaccion pero mi ta dudando kico exactamente. E persona a menciona cu dentro di poco siman lo tabatin un encuentro di introduccion na Hospice Atardi. E organizacion ey tabata algo nobo pa mi. Mi a inscribi pa e encuentro y despues di a haya e informacion, mi a dicidi di forma parti di e grupo di boluntario na Hospice Atardi.

   Mi ta traha un biaha pa siman, mi ta traha e warda di merdia (5 ora). Mi ta sostene e enfermera ora di baña e huespednan, yuda e huespednan come/bebe algo, combersa cu nan (tene nan compania), yena e cashinan cu e articulonan necesario cu mester ta den nan cashi, muha mata, laba tayo si tin pa laba, etc. Como boluntario bo por dicidi kico bo contribucion ta. Bo por scoge pa yuda cu huespednan of haci otro tarea cu no ta cu huesped pero cu ta contribui na un bon ambiente den e cas di Hospice Atardi.

Hospice Atardi ta percura pa tin regularmente curso y/o lezing/lectura pa amplia nos conocemento pa por brinda mihor servicio na e huespednan. Esaki ta dunabo mas siguridad den con cuida y atende e huespednan. E lugar/cas mes ta un lugar cu ta organiza di tal manera cu ta laga e huespednan y nan famia (pa cual ta e intencion naturalmente) sinti manera nan ta na cas. Ta un satisfaccion pa por contribui na cu e huespednan ta pasa nan ultimo dia-/simannan den un ambiente cu ta genera paz y trankilidad pa nan, teniendo cuenta cu nan deseonan y cu e ambiente rond di nan.

   Ta bunita tambe pa wak con e personal 'vast' (manera enfermera, coordinador etc.) y e boluntarionan cu t’ey  pa basta tempo caba, ta yudabo como notabo den e trabao pa haya miho bista kico a trabao ta encera. E ambiente bao boluntarionan y personal ‘vast’ ta dirigi riba cumpli cu e tareanan cu mester cumpli cune den un ambiente amical.

En corto: Mi experiencia cu e trabao di boluntario ta positivo. E ta duna mi un gevoel di satisfaccion pa por duna e tiki cu ami por haci p’e huespednan (y indirecto nan famia) pa nan sinti cu Hospice Atardi t’ey pa nan (cuido y atencion) den nan tempo dificil.