Parlamentario Ricky Hoek, fraccion di MEP
ORANJESTAD (AAN) – Parlamentario Ricky Hoek a pone atencion riba e Dia Internacional di Maestro, y a expresa deseonan di hopi exito, forza, y sabiduria, pasenshi cu nan alumnonan.
Parlamentario Hoek a subraya cu un maestro ta hunga un rol importante den e bida y desaroyo personal di cada alumno, na Aruba, for di chikito cu nan ta bay crèche, scol preparatorio, basico, secundario, y mas avanza.
E parlamentario a remarca cu nos tur sa cu e rol di maestro a cambia den e ultimo decadanan. Sinembargo ta importante pa e maestro keda sigui fungi cu e rol di inspirado y motivador pa stimula e studiante, pa asina sigui progresa, crece y desaroya su conocemento pero tambe su caracter, cu un actitud firme y completo y un bon postura, pa asina bira ciudadanonan critico, firme, saludable y conciente pa asina hiba nos pais dilanti, den futuro.
Hoek a indica cu e alumnonan ta Aruba su futuro y comunidad ta depende di nan y asina e maestronan tin un rol sumamente importante di educa y yuda nan pa bay dilanti y crece den esaki.
E parlamentario a yama masha pabien na tur e maestronan na Aruba deseando nan hopi forza, sabiduria y pasenshi cu e bunita trabao cu nan ta haci cu nos mucha y hobennan na Aruba.
