PORT-AU-PRINCE: Un buelta hopi raro a wordo observa awor den e movimento di protestanan anti-gubernamental na e ciudad di Gonaives,
na Haiti. Aki tin hendenan cu ta hopi ferviente den nan protesta, y ta purba na eherce hopi presion riba e gobernantenan na poder.
Pero awor sorprendentemente, na un forma diripiente, awor nan rabia a cuminza bay den direccion di Merca, y nan ta acusando Washington di ta dunando apoyo na permanencia di prome ministro Ariel Henry. Y hasta por a mira hendenan ta hisa bandera Ruso y gritonan di yudanza pa e Rusonan bin “rescata” nan pais.
Algo cu a pone poblacion haya hopi rabia, ta ora cu dia 12 di September, prome ministro a tuma decision cu ta elimina e subsidio riba combustible, cu a pone e prijs di esaki subi drasticamente. Pesey mes a cuminza reclama y exigi pa e medida ey wordo elimina, y despues nan a sigui cu e protesta pa exigi pa prome ministro bay cas bek.
E disgusto di e Haitianonan a redobla den ultimo dianan, cu manifestacionnan nobo. Y keto bay e ciudad di Gonaives ta sigui di ta un di e “puntonan cayente” den e crisis aki cu ta afectando Haiti, unda tur dia tin blokeo di caya y careteranan.
“Ta Merca ta esun cu a instala Ariel Henry pa e chupa sanger di pueblo haitiano,” ta loke un homber identifica como Ronel Paul tabata grita den microfon. “Mira e muchanan, ni sikiera nan por bay scol,” el a bisa. “Cu Rusia si nos lo tin mihor condicion di sali di esaki,” el a agrega.
