Un 88% di consumidornan ta premira cu den e siguiente 6 luna prijsnan lo ta mas halto

Banco Central di Aruba

ORANJESTAD (AAN): Banco Central di Aruba (BCA) a conclui e Encuesta di Confiansa di Consumidor pa e di cuater trimester di 2025. E encuesta di confiansa di consumidor ta evalua e percepcion economico di e consumidor local.

Preocupacion principal di consumidor den e di cuater trimester di 2025 pa e siguiente 6 lunanan:

• Deterioracion den e situation di negoshinan y di e economia a baha te na 36% (2025-III: 56%).
• Alrededor di 32% di e respondentenan ta premira cu lo ta mas dificil pa haya un trabou nobo (2025-III: 42%).
• Como 31% di respondentenan ta premira cu e posicion financiero di gobierno lo empeora (2025-III: 39%).

Consumidornan a keda pesimista, aunke e Indice di Confiansa di Consumidor a subi cu 3,6 punto di índice te na 96,4 den e di cuater trimester di 2025 (mira Grafico 1).

E Indice di Habito di Consumidor a crece cu 4,2 punto di indice te na 97,7 durante e di cuater trimester di 2025. E Indice di Situacion Actual y e Indice di Expectativa a subi den e di cuater trimester di 2025 cu 3,9 punto di indice y 3,2 punto di indice, respectivamente, te na 96,3 pa ambos. Mientrastanto, e Indice di Expectativa di Prijs a subi un poco na 90,4 durante e di cuater trimester di 2025 (mira Grafico 2).

Prijsnan mas halto den e proximo 6 lunanan ainda ta keda un preocupacion grandi pa e respondentenan, como cu 88% di consumidornan ta premira cu den e siguiente 6 lunanan prijsnan lo ta mas halto, cual ta dos punto di porcentahe menos compara cu e di tercer trimester di 2025. Respondentenan cu a indica cu nan por “cumpra menos cu nan entrada compara cu 6 luna pasa” a baha cu 8 punto di porcentahe te na 80% den e di cuater trimester di 2025. Pa locual ta e respondentenan cu a expresa cu nan ta spaar menos, esaki a baha cu 14 punto di porcentahe te na 32% den e di cuater trimester di 2025.

E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidornan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di consumidornan.