Ultimo parti di renovacion di Pius X School a keda completa

ORANJESTAD(AAN): E renovacion di Pius X School na Dakota a keda cla y relaciona cu esaki tabata tin un conferencia di prensa Diamars mainta.

E proyecto di renovacion a wordo haci via Divi Impact Foundation y Diamars presidente di e fundacion Ricardo Vrolijk a duna un splicacion riba e proyecto, di cual e ultimo parti tabata renovacion di e bañonan cu a bira ‘al estilo di hotel’.

“Cu sumo placer nos ta para aki dilanti pasobra nos a yega na culminacion di renovacion di Pius X School”.

E ta un renovacion cu colaboracion di Divi y Tamarijn All Inclusive cu a start e proyecto algun aña pasa, segun Vrolijk.

El a splica tambe cu tur e empleadonan di Divi tur luna ta contribui cu un suma y e compania mes ta match e suma, pa pone esaki den e fondo.

Segun presidente di e fundacion, e renovacion a bay den fase pa motibo cu tabata tin hopi trabao cu mester a wordo haci, incluyendo pone airco, verf e lugar y contribui cu E-Boards y tablets.

“Por ultimo nos a renova e bañonan y nos kier a laga atras e idea cu mas scol tin necesidad y tin mester di ayudo di otro instancia of companianan tambe”.

E renovacion aki a costa nos casi 250.000 florin y nos ta orguyoso di con e proyecto a resulta, mientras cu banda di esaki nos ta haciendo otro proyectonan tambe, segun Vrolijk.

El a sigui bisa durante e periodo di vakantie, e fundacion a inverti tambe den e yiunan di e empleadonan di Divi via un ‘Back to School Program’, unda cu nan a wordo regala un certificado pa bay busca nan uniform di scol.

E fundacion a yuda dos studiante tambe cu un Scholarship, di cual uno ta pa Costa Rica y e otro pa Corsow.

Tin tambe uno pendiente pa un studiante cu ta bezig cu di Masters Degree.

“Sinembargo, awe nos enfoke ta riba Pius X School, pasobra e ta un joya den centro di  Dakota”, segun Vrolijk.

El a dirigi su mes na e maestronan di  e scol ora cu el a bisa: “Pabien juffrouw Sheila, pabien tur maestro, nos ta sumamente orguyoso y satisfecho di por contribui cu bosonan, pasobra mi sa cu bosonan por bin bek scol cu un cara contento, pasobra bosonan tin un scol practicamente nobo y mi kier wak cara di e muchanan ora cu nan wak e bañonan, pasobra eseynan nan no a wak ainda, segun presidente di e fundacion.