Sin duda e ‘Medisch Administratie’ ta fungi un trabao importante na Hospital

Ta procesa tur informacion den sistema di data pa medico y directiva analisa

ORANJESTAD (AAN): Si tin informacion corecto, por tuma e decisionnnan corecto. Departamento di Medisch Administratie na HOH su tarea principal ta pa procesa data pa file di pashent completamente den codigo.

   Na e manera aki por comparti e informacion di data di un forma completamente anonimo cu directiva, AZV y gobierno pa medio di uzo di codigo den un sistema digital automatisa. Esaki cu e meta pa por tin disponibilidad di data pa por ehempel tuma decisionnan den cuido medico riba termino corto y tambe termino largo. Pues DATA ta sumamente esencial pa Dr. Horacio E. Oduber Hospital. Medisch Adminstratie ta e departamento cu ta registra, warda y percura pa privacidad y siguridad di tur file di pashent.

   Recientemente Emile Thiel di departamento Medisch Administratie a logra termina su educacion y awo por bisa cu e ta un “Health Information Management Professional”.

   Esaki tabata un trayectoria di dos aña y el a siña diferente materianan esencial pa por eherce su trabao manera Healthcare Informatics, Coding and Abstracting, Data Analysis, Healthcare Statistics y tambe Biomedical Sciences. Na momento cu el a termina cu su educacion, di biaha el a sigui p’e certificacion internacional di Canada cu e instituto Canadian Health Information Association (CHIMA) y el a logr’e den su prome biaha.

   Algo cu normalmente por dura un persona algun bes prome cu e logra Emile t’e prome na HOH cu a logra esaki den un solo biaha. P’esey e ta orguyoso di su mes!

   Emile ta e di cinco “Medical Coder” di hospital, y e di dos cu e certificacion di CHIMA. E team di Medical Coders ta examina tur diagnostico y intervencion documenta door di specialistanan pa cada pashent cu bishita hospital y traduci nan den codigo. Ta haci esey segun standardnan y reglanan di Canada pa e data por ta di calidad, exacto y confiabel.

   Ta compila esakinan y hinca tur codigo den un database. Siguientemente lo por saca raportahe y sostene a base di data, e decisionnan pa directiva, gobierno, AZV etc. Asina aki por ehempel por mira unda e trends ta cu mester di mehoracion.

   Ehempel di codigo ta e desaroyo di Covid-19 cerca pashentnan cu tabata interna den Hospital. Ta importante pa sa nan diagnostico y intervencion entre otro rosea cortico, inflamacion di pulmon y complicacion cu Covid-19 por causa. Di e forma ey directiva di hospital, gobierno y AZV por haya un analisis di tur Covid-19 pashent. Ademas, ‘code’ Covid-19 riba su mes ta mandatorio y prioridad n’e momentonan aki, tambe internacionalmente. 

   Loke ta super interesante ta cu e informacion anonimo aki por worde compara cu otro dato den nos region, Merca, Europa, Canada y otro parti di mundo. Na final di dia Aruba ta den Caribe y tin diferente estilo di bida pues sigur interesante y necesario.