Aruba mester tene consideracion cu e base di su leynan social peligroso - *Nacionnan Uni a paralisa loke mester tabata nan trabou durante pandemia - *Un mundo na careda pa desaroyonan cu despues di 1945 a wordo ignora
ORANJESTAD(AAN)—1945 a marca historia y ta sigui marca historia. Despues di un winter, un invierno di hamber, mundo liber ta logra enfrenta e ultimo forsanan di Hitler. E prome bom atomico ta cay riba planeta tera y mundo a cambia pa nunca mas bolbe na normal.
Awe ta wordo papia di un “normal nobo”. Un normal cu kier mara solamente na e atake di un malesa, cu a prsenta na mundo cantidad di casonan cu pa demasiado tempo, mundo no kier a atende.
For di 1945, un mundo nobo a nace cu solucionnan pa tempo corto pero tambe sin e contenido cu e mester tabata tin si kier a alcansa un planeta mundo contento.
Na 1945 e restoracion economico di mundo a origina e “epoca di oro” den cual placa a lora, mientras decisionnan cu lo a marca mundo a wordo tuma.
Pero pa mundo, paz y bienestar di hende tabata garantisa, ora a introduci Nacionnan Uni, caminda mundo ta reuni pa debati pa despues cada hende sigui su caminda.
Pa 2030 Nacionnan Uni a bolbe introduci un plan ambicioso pa no tin mas hamber ni miseria na mundo, pero Nacionnan Uni no a tene na consideracion cu Covid-19 por a bati na porta despues cu ya e prome version di e Coronavirus a presenta pero cantidad di otro malesanan cu ta wordo combati cu remedi, cu dor di e hecho cu curpa humano ta costumbra cu nan, ta perde nan efectividad.
Pero separa di Covid-19, otro factornan importante a bini dilanti y ta e motibo cu awe mundo ta cana riba su mannan cu su pianan ta busca strea na mundo.
Mundo no a atende problemanan cu a keda pendiente. E guera cayente cu tabata Segunda Guera Mundial, a bira un guera friu. Un guera cu a crea un crecemento tecnologico enorme.
Avionnan a crea e Era di Jet. Awe e avionnan aki ta yuda crea un desaster natural cu ta haci cu mundo ta bira cada dia mas calor.
Cantidad di arma peligroso, cu por destrui mundo, a wordo getest. Mundo ta sigui produci mas mientras na Nacionnan Uni ta bini hunto, pa trata na evita un paz cu no ta existi.
Mundo ta coopera cu otro, pero na demasiado ocasion ta coopera caminda ta cumbini.
Dilanti porta di Aruba tin e prueba di dictadura di Nicolas Maduro, cu ta wordo completamente ignora pero ta uno di e pruebanan di fracaso di Nacionnan Uni cu a nenga di condena e dictadura di Nicolas Maduro.
Asina Nacionnan Uni a sigui evita un confrontacion tras di otro y awe por bisa cu practicamente tur ta rementa den su man.
Na Aruba, mescos cu henter mundo actualmente, e variante Delta a haci su entrada desastroso manera por a spera cu por pasa na un isla, cu ta depende di exterior.
E pandemia lo tin resultado sigur pa Aruba cu tin un structura hereda y di acuerdo cu e base Hulandes, cu ta socialista.
Leynan Hulandes a haci Aruba un atraccion pa resto di e region cu no conoce leynan social cu Aruba si conoce y cu ta basa riba participacion financiero a base di entrada di un persona.
Mas halto e entrada, mas ta paga na seguronan social den cual tur hende ta haya mes trato.
Awe Hulanda, cu tabata e ehempel legal di Aruba, ta yuda Aruba sobrevivi. Ta bon cu Hulanda ta presente pasobra Aruba mester haya un forma pa AZV, SVB, Pensioen di Behes entre otro por sobrevivi mescos cu e pakete di areglonan di trabou den Gobierno cu ta herencia di tempo colonial.
Ora resumi tur loke ta pasa na mundo, ta mira con despues di Segundo Guera Mundial un ilusion a nace. Pero no a sigui crea nacionnan pa refugiadonan na luganan cu tin teritorio pa haci esaki.
Refugiadonan, hendenan cu ta wordo persigui pa nan conviccion of pa nan condicionnan miserabel di bida, ta sigui crece den cantidad na un mundo cu mester busca un solucion y mester cuminsa enfrenta dictadornan cu ta kibra democracia cu ta e base riba cual Nacionnan Uni a nace.
Pa resumi, mundo mester ordena su sistema. Reino y Aruba mester ordena nan sistema, loke ta bira exigencia basico di e normal nobo, cu realmente ta bira un sistuacion den cual mundo ta bay soluciona tur problema cu e no por a soluciona for di final di Segundo Guera Mundial ora mundo a habri porta pa un “normal nobo” cu un Era di Oro cu awe nos no por mantene mas, cu jet y petroleo, cu ta destrui planeta mundo y cu sernan humano cu no a conoce e solucionnan priminti pa nan condicionnan di bida.
Awe e situacion di Covid-19 ta los un disparo riba e pretencionnan di Nacionnan Uni cu nunca a wordo realisa.
