UA a organiza interesante Carousel Social na Colegio EPI

Jonathan Trinidad, MBA Lecturer di UA:

*Cu participacion di studiantenan di Universidad y Colegio EPI

*Tambe diferente instancia y profesionalnan tabata presente 

ORANJESTAD (AAN) – Jonathan Trinidad, MBA Lecturer di Universidad di Aruba, den entrevista cu DIARIO a duna di conoce cu Universidad di Aruba, specificamente a organiza su di dos evento di Carousel Social, na unda a pone varios organizacion den sector social, como tambe departamentonan cu ta traha den e sector aki, p’asina bin hunto y provee informacion na e studiantenan.

            “Awe nos ta na Colegio EPI, pues no solamente studiantenan di Trabao Social pero tambe di Salubridad y Servicio tabata presente. E meta, vooral, di e evento aki ta pa por duna studiantenan conocemento di e sector social, y e ta parti di un materia cu ta wordo duna, cu ta Trabao Social pa por duna fundeshi na e sector social y asina ta duna conocemento tambe di diferente organizacion”, Jonathan a indica.

            El a agrega cu e meta mas tanto ta pa nan sa cual ta e fundacionnan cu tin, e departamento laboral di e Sector Social, pero den e caso aki tambe nan producto y servicio, y proyectonan en general, cu e organizacion social ta ehecutando den e comunidad di Aruba.

            “Actualmente, den Social Work na Universidad di Aruba, nos ta riba 40 studiante, entre e prome te di cuater aña, presente; anto di Colegio EPI tambe tin alrededor di 60 studiante cu a ser invita. Nos tin 33 organizacion presente di e sector social, conhuntamente cu riba 60  profesional cu a bin awe mainta, pa provee informacion y tambe papia, eigenlijk, di kico nan ta haci den comunidad”, Jonathan a duna di conoce.

            Jonathan, biniendo di e sector social y tambe trahando na Universidad di Aruba, ta kere cu e sector aki ta keda un parti sumamente importante, pasobra e problemanan social constantemente, ta keda presente, y mester keda ekipa no solamente e veld social, pero tambe e studiantenan cu ta e futuro trahadornan social, pa tin no solamente e conocemento, pero tambe e habilidadnan pa por maneha e diferente problemanan social cu nos comunidad ta experienciando. “Pa nos ta hopi importante tambe pa brinda e oportunidad aki den forma di un evento, p’asina aki sigui educa nos studiantenan cu ta e futuro profesionalnan”, Jonathan a reitera.