Tanto Partido FuTURo y Partido PPA a keda cla cu firma

Rij di hende pa duna sosten na nan partido politico

ORANJESTAD (AAN):  E proceso di sosten di lista a cuminza Dialuna. Por a mira rij di hende na e diferente luga asigna pa firma sosten di e lista di e partidonan politico.

   Conseho Electoral Aruba como hoofdstembureau ta guiando e eleccion. Presidente Suplente Señora Grasita Griffith a informa cu conforme Articulo 17 di Ordenansa Electoral, e partidonan politico cu no a logra 1 asiento durante e eleccion ultimo na 2021 mester ricibi sosten di nan lista politica cu 586 firmanan di votadornan. Esaki ta 1% di e votonan valido di e eleccion anterior.

   Firma pa sostene lista di candidatonan di partido politico por worde haci entre 21 di October te cu 29 di October 2024 (excluyendo weekend) di 9:00 am te 8:30 pm na tres lugar, esta: (*) Dependance Censo na L.G Smith Boulevard 66.  (*) Hulpbestuurskantoor Noord.  (*) Hulpbestuurskantoor Savaneta.

    Riba prome dia, por a mira rij largo di personanan cu a acudi na e tres lugarnan pa asina pone nan firma.  Por a nota cu mayoria cu a acudi a bay pa sostene tanto Partido PPA di Otmar Oduber, y Partido FuTURo di Gerlien Croes.  Nan ta esnan cu ya caba riba prome dia a keda cla cu nan firma.

   Pa 3:00 pm, Partido Curpa a haya 80 firma, Partido FuTURo a ricibi 343, Partido HTC a ricibi 19, Partido LPR a ricibi 78 firma, Partido MIA a ricibi 7, Partido PPA a ricibi 361 firma, Partido RED a ricibi 94, y Partido UPP a ricibi 4 firma.

    Pero pa 6:05 pm, ya caba Partido FuTURo a logra e 586 firma, pues a bira e prome cu den 9 ora pico a keda cla.

   Poco despues, pa 6:13 pm, a toca turno pa Partido PPA a logra 586 firma.

   Pa 8:30 pm, Partido Curpa a cera dia cu 164firma, Partido HTC cu 73 firma, Partido LPR cu 225firma, Partido MIA cu 21 firma, Partido RED cu 232 firma, y Partido UPP cu 17 firma.

   Pues awemainta 9:00 am, portanan lo habri bek pa firmamento sigui pa Partido Curpa, Partido HTC, Partido LPR, Partido MIA, Partido RED, y Partido UPP.