Hose Figaroa, lider di FTA ta reitera:
*Pero wak cu e trahado su edad no ta mucho halto
ORANJESTAD (AAN) – Hose Figaroa, Presidente di e Federacion di Trahadornan di Aruba (FTA), den entrevista cu DIARIO a confirma, cu e realidad cu nos pais tin su dilanti ta cu no tin suficiente trahado pa e cantidad di cambernan di hotel, cu lo ta habriendo aki dos luna y otro aña tambe, y cu lo mester bay importa trahado.
El a reitera cu mester wak bon, of bin cu criterionan fiho con ta bay importa e trahadornan aki. Wak pa no importa trahado cual edad ta mucho halto, y esaki no ta pa discrimina pero mas bien pa proteha e trahado su economia, pasobra mañan e por haya su mes den un situacion similar, na loke ta pasando awo.
Entre mas largo e hendenan aki contribui na e fondo di pensioen di behez, mas stabil nan lo mantene e fondo aki. “Pues, atrobe. Nos tin diferente reto nos dilanti, specialmente mirando e cantidad di hende cu lo bay baha of ta bay yega na edad di cobra AOV, y no ta haya un AOV completo, pasobra esey ta bay bira un challenge, pero banda di esey e fondo mester wordo mantene na bida, y e unico manera di haci esaki ta aumenta e contribucion na e fondo”, Figaroa a remarca.
El a subraya cu esaki riba su mes lo tin influencia riba e costo di bida y e cantidad placa cu bo tin pa biba di dje.
“Ya pa un par di luna caba nos ta bezig cu charlanan na pia di trabao no solamente pa e parti di presupuesto, pero tambe conhuntamente cu e fondo di pension di turismo, unda cu nan ta bay na pia di trabao, y ta presenta, entre otro, e importancia pa bo tin un pensioen banda di bo AOV, y e importancia pa contribui mas hopi na e fondo aki, pasobra hopi hende ta contribui na e minimo cu ley ta obliga bo, pero e minimo aki no ta yuda bo cu un suma grandi, na momento cu bo baha cu pensioen”, Hose Figaroa, lider di FTA a reitera.
