Pa nan tur ta registra y cumpli cu impuesto
ORANJESTAD (AAN): Siguiendo cu entrevista cu señora Tisa LaSorte, CEO di Aruba Hotel And Tourism Association (AHATA), tocante e tema di vacation rentals y cumplimento di pago di impuesto, el a subraya cu pa por tin un bista real y haya un transparencia completo, tambe mester tin dato di cuanto cas y apartamento ta pagando impuesto y con esey a crece.
“Anto, e ora ey nos ta compare cu cuanto ta existi y e ora ey nos por wak cuanto nos ta kere cu ta existi y cuanto di nan ta registra y ta pagando. Esey ta e dato real cu nos por wak si cumplimento ta creciendo”, La Sorte a señala.
E CEO di AHATA a reitera cu tur hende mester paga belasting pa e ora ey por competi na un manera sano. “Nos tin, mi ta kere mas cu dos aña papiando di e tema aki, cu ta hopi tempo caba. Nos tabata tin combersacion cu e gobierno anterior, y eynan nos ta keda warda pa solucion, y awo nos tin un gobierno nobo. E aspecto negativo di esey ta cu bo ta sinti cu bo ta cuminza di nobo”, señora LaSorte a señala.
El a añadi cu ora ey, tin un gobierno nobo cu ta bay analiza henter e situacion atrobe, y den AHATA su mente nan ta mira esey como un retraso te ora nos yega na un solucion.
“Pues, nos ta sperando. Nan a indica na nos cu nan ta trahando riba un solucion, nos no sa kico e solucionnan ey ta, dus nos no sa ainda si e solucionnan cu nan ta trahando riba dje ta solucionnan cu nos ta di acuerdo, si enberdad nan ta haci un diferencia den e sector, pasobra, corda cu tin un grupo grandi di vacation rentals cu si ta paga, y loke nos ta busca ta pa nan tur paga. Tambe nos ta busca, loke ta e parti mas importante, cu ta registracion. Kico ta loke bo ta bay haci pa registra nan. Nos ta wardando kico gobierno nobo ta bay implementa pa por hisa e cantidad registra den e sector aki”, señora Tisa LaSorte, CEO di AHATA a conclui.
