Turista di crusero Carnival Horizon a baha na Bonaire y no a regresa barco mas

Buskeda intensivo awor na isla di Flamingo

• Buskeda pa Jessica Collins di 47 aña di edad 

ORANJESTAD (AAN): Informacion ricibi di Bonaire, ta indica cu Cuerpo Policial Hulanda Caribense (KPCN) ta buscando constant desde Diaranson anochi caba, pa un turista femenino kende a baha di barco crusero, y no a regresa mas pa ora cu esaki tin di bandona waf di Kralendijk.

    E barco aki Carnival Horizon tabata Diamars caba na Aruba, unda e tabata den Waf di Playa for di 8:00 am, te ora cu e barco a debarca pa 10:00 pm, pa asina nabega den 10 ora di tempo y yega Bonaire.

   Pasahero a desaparece: Diaranson mainta, 17 di September 2025, e barco a mara na Pier di Bonaire un poco prome cu 8:00 am.  Na e isla aki tambe e tin di keda te cu 10:00 pm.

   Un di e pasaheronan abordo, esta e turista femenino Jessica Collins di 47 aña di edad, a baha di e barco pa asina bishita Bonaire.  Pero e no a regresa mas pa ora e barco tin di sali 10’or di anochi.  Nan a keda warda un poco, y despues Capitan a los di e Pier y a sali rumbo pa e siguiente isla, cu ta Curaçao.

   Polis a wordo poni na altura y a cuminza investiga.  Polis di Bonaire lamentabelmente no a duna ningun informacion si acaso tin mas miembro di famia cu tabata abordo cu ne.  No tin informacion si acaso un miembro di famia awor a keda atras na Bonaire, ynada mas.

   Polis a djis duna un potret, y pidi pa cualkier hende cu por a mira Jessica Collins, of cu por tin informacion, pa por fabor drenta den contacto cu nan.

   E barco aki a sali Diasabra atardi 3:30 pm for di Cruise pier na Miami pa un viahe di 8 anochi den zuid di Caribe.  Unico tres isla cu nan a bishita ta Aruba, Bonaire, y Curaçao.  Ayeratardi e barco a bandona Curaçao, y ta viahando pa yega Diadomingo mainta, dia 21 di September bek na Miami.

   E barco Carnival Horizon tin Miami como su ‘homeport’, y ta un crusero di clase ‘Vista’ cu tin capacidad di 3.960 pasahero, y tin 1.450 miembro di tripulacion.  E barco ta operando pa Carnival Cruise Lines desde Maart 2018.

   Speculacion na cantidad: Tin hopi speculacion ta plamando rond na e isla di Bonaire.  Varios persona ta pensa cu kizas e turista a conoce e ‘amor di su bida’, y lo a keda atras.  Otronan ta haya cu e situacion ta mas serio, y ta spera cu cualkier hende cu sa di algo pa duna tip na Polis.

   Otronan ta nada contento cu e minimo di informacion cu Polis di Bonaire ta duna.  Pasobra nan kier sa si acaso Jessica tabata riba crusero su so.  E no a viaha cu miembro di famia of amistad.  El a baha bay tera cu e famia/amigonan aki y nan so a regresa barco sin e dama.

   Tin cu ta spera cu Polis di Bonaire tin suficiente manpower pa revisa tur camera cu tin den centro di Kralendijk pa check tur imagen di henter Diaranson eynan.

   Te cu Diahuebs anochi, no a ricibi ningun update mas di Polis di Bonaire riba e caso aki.