E ta retira temporalmente
- Decision tuma riba Diaranson anochi
ORANJESTAD (AAN): Diaranson anochi, Parlamentario Otmar Oduber a anuncia un decision cu el a tuma, mustrando cu e ta distancia su mes di Parlamento temporalmente. E ta haci esey pa ‘atende e caso’ cu tin contra dje den Corte Superior, cual aspecto di e caso aki e ta califica como abuso y humiliacion.
Segun Otmar Oduber, e ta pasando caba den 5 aña di persecusion. El a demostra cu no solamente tur e acusacionnan inicial contra dje tabata falso, pero tambe el a logra haya e confianza, apoyo y sosten di e pueblo di Aruba durante e ultimo eleccion un biaha mas. Pa esaki e ta y lo keda semper humildemente agradecido.
Pero e ta mira cu Ministerio Publico tin otro metanan, no a keda satisfecho cu e ultimo sentencia y a dicidi di apela e caso den Corte Superior. Oduber a indica cu e tambe a dicidi di apela, y asina cu tur confianza e lo bay proba su inocencia completo y demostra cu loke a bin ta tuma lugar durante ya pa mas di 6 aña, ta simplemente un abuso di poder di parti di Ministerio Publico y forzanan politico cu nunca lo por a haci e mesun cos aki cu un Minister of ex-Minister na Hulanda.
“Mi a tuma e decision di bay tur cu tin contra e abuso y persecucion na un forma contundente y definitivo, respetando e trias politica y dunando respet na e organo mas halto di nos Pais. Pa e motibo aki mi persona a dicidi di tuma mi retiro temporal como miembro di Parlamento pa asina actua y duna contenido na e palabranan ariba menciona,” ta loke Parlamentario Oduber a declara.
Por corda cu den pasado caba Otmar a yega di retira como Minister, siendo e di dos ‘votegetter’ di henter Aruba, pero a haci esaki pa principionan y awe e ta bisa cu no ta diferente.
“Mi principio y respet pa e funcion di honor aki, ta exigi pa mi duna mi mes e espacio pa atende cu e caso y asina esaki termina, lo mi asumi e responsabilidad back, representando nos pueblo cu tur honra y fervor. Cu mi posicion y decision tuma, mi ta spera di por contribui na un Parlamento mas respeta, contrario na hechonan di otronan den pasado.”
Hala pa Eduard Pieters tuma puesto: Sr. Oduber a declara cu e no lo haci uzo di e derecho pa “Overbruggings toelage” y ademas lo sigui sostene e fraccion di PPA y apoyando e candidato señor Eduard Pieters como e proximo miembro di Parlamento cu den opinion di Sr. Oduber ta bon prepara y ta haciendo un excelente trabao den e fraccion oranje. Señor Pieters lo keda tambe sosteni den fraccion pa otro colega di partido, cu sigur lo ta un apoyo grandi na e tarea importante di e fraccion di PPA.
El a sigui bisa cu e famoso lider Martin Luther King Jr. a yega di bisa: “The time is always right to do what is right” y e momento husto pa mustra respet na nos organo di Parlamento y e Trias Politica cu ta e pilar di nos democracia, ta awo!
Cu esaki, Oduber kier ta e ehempel di con ta duna honor na e organo mas halto di nos pais y cu no mester tin ley pa regula loke mester ta “fatsoen”. No mester ley pa por haci loke ta worde spera di un bon lider,” asina Sr. Oduber a sigui bisa. El a agrega cu e lucha pa restaura respet y dignidad pa cu e organo principal di nos pais ta cuminsa cu e decision y accion aki cu su persona a tuma pero tambe cu e decision di “principio” di su persona pa a bay corte contra un acto cu den su concepto ta anti constitucional y anto democratico. Riba e potret por mira Otmar Oduber y Eduard Pieters.
E decision tuma pa Parlamento ta stroba su persona di eherce su funcion conforme nos constitucion y ta limita e Miembro di Parlamento den su trabao y responsabilidadnan di representa e votador di Partido Patriotico di Aruba y e pueblo di Aruba engeneral conforme nos “kiesverordening”. E hecho cu Juez den su sentencia ta confirma e hecho cu e medida tuma pa e mayoria den Parlamento ta “Stroba” e trabao di mi persona pa representa mi pueblo, pero cu respetando e trias politica, ta prefera di laga e 3 organonan mes regula nan mes, NO ta cambia e conviccion cu cual nos lo sigui vocifera, den nomber di e mas di 3500 votonan cu a pone PPA back den Parlamento despues di 20 aña di ausencia, e opinion y interes di e pueblo Arubano.
El a finaliza bisando: “Cu Dios mi dilanti, mi famia band’i mi y e pueblo mi tras, nos lo logra husticia y libertad di persecucion for once and for all.”
