Sesenta aña despues cu e Epoca di Oro a cambia hubentud mundial
*Na 1965 Allen Ginsburg a usa poder di flor pa destrui moral publico
*Un disparo ta exigi ratificion mundial legislativo di balor di hende
ORANJESTAD (AAN) — Pa awe por atende cu problemanan serio, mester inventarisa cambionan grandi cu mundo a conoce durante Siglo 20, den cual progreso mundial a entrega tambe armanan directo manera e bom atomico, pero tambe e armanan pa destrui e valornan moral y na un forma special, e valor di hende como hende.
“E poder di flor” (Flower Power) a bira nomber di un revolucion introduci na añanan sesenta dor di Allen Ginsburg , cu a uza e accionnan contra guera cu metanan positivo cu e armanan cu el a presenta como instrumento di su revolucion.
“Make love not war” ta cualifica e forma cu por manipula cu mente di hende sigur na un momento cu mundo ta sclama pa paz.
E “love” sinembargo cu Allen Ginsburg kier a introduci, no ta e amor cu generalmente ta uni hende na hende den accionnan positivo, pero mas bien e relacion sexual sin limite cu a kibra valor di hende den su union cu uzo di droga.
Na añanan sesenta Ginsburg a entrega mundo, e armanan pa droga plama como felicidad di hende cu ta deshaci di norma y regla pa den relacionnan sexual completamente liber, hende goza di loke mester tabata su felicidad.
Sigur e hubentud cansa di guera cu a sigui na Vietnam y tabata produci horor, a cay den e ambiente di festivalnan di “flower power” cu musica y droga como inspiracion pa crea e mundo nobo, cu a cambia mentalidad di hende pero tambe a habri pa negoshinan nobo cu te awe mundo kier combati.
Evolucion di mundo sigur a trece cune, revision di cierto puntonan moral mara directamente mara na e valor di hende, cu a wordo manipula den e revolucion di Flower Power cu tabata basa ariba relacion sexual (pues no sikiera amoroso) directamente mara na uzo di droga den cual festivalnan grandi y musica moderno, mester a destrui e moral existente.
Ta den e tempo aki cambio di mundo a haya su mihor aliado, cu tabata medionan nobo di comunicacion manera sigur television, cu a haci pa cambionan bira directamente visibel na henter mundo.
Mundo a cambia sigur pa loke ta trata su base moral, basa ariba libertad sexual, den cual e placer sexual no tabata mara na un relacion ni compromiso, pero a ricibi e formula pa hende uza hende pa gozo sexual, cu tur e resultadonan cu esaki a nifica pa bida familiar y comunidad.
Gozo sexual tabata parti di festivalnan musical grandi na aire liber den cual miyones y miyones di hende tabata uni pa goza di loke mester a sostene e libertad sexual nobo, cu tabata droga, por a crea un mundo nobo den cual hende mester a bandona limitenan moral.
Despues di tempo hende a cuminsa regresa na normanan y balor cu e tempo a wordo rechaza.
Den esaki por mira un lucha nobo pa sigur loke ta wordo defini den e “dignidad di hende” cu ta duna hende e balor mas halto cu solamente placer fisico por entrega.
E revolucion di añanan sesenta den cual homber y muher mester a bira obhetonan sexual domina pa droga, placer y placa, a cuminsa ricibi resistencia den e lucha di hende muher cu a evoluciona y a bay contra hende muher como obheto sexual y den e igualdad pa hende muher, ta busca normanan di balor di hende muher.
Droga a keda uno di e factornan mas grandi cu te awe mundo ta trata na atende, despues cu el a bira e arma di añanan sesenta pa pone un fin na reglanan existente y canta un revolucion di “libertad”, cu na cierto momento a bay mas leu cu libertad.
Ora bay por ehempel na e lucha di hende muher, ta mira cu e prome buskeda tabata, pa e muher no bira obheto di deseonan sexual, pero wordo respeta como ser humano.
Den transcurso di tempo e balor di e ser humano te awe ta busca e forma pa haya un balanza despues di e forma cu el a wordo destrui pa mas honor y gloria pa criminalidad.
Kico ta e balor di hende? Charlie Kirk tabata robes ora el a splica cu si ley pa tur hende ricibi arma produci algun victima, no ta problema.
Cada morto cu cay pa medio di violencia ta un disparo contra e valor di hende, cu a bay perdi den e morto di Charlie Kirk na man di un opositor.
“Flower Power” tabata e e base cu mester a pone un fin na violencia y e derechonan mas sagrado di hende despues di gueranan mundial y durante e gueranan cu a sigui entre otro na Vietnam.
E tabata e anhelo di un generacion nobo pa un futuro bunita yena cu aroma dushi di valor humano, cu tabata muri den e sombranan di guera.
Pero el a wordo uza pa destrui valornan humano, cu ta forma un pakete total den cual central ta keda cu un hende no ta un obheto, e valor mas grandi di creacion cu a wordo entrega na hende pa maneha y no pa destrui cu ningun tipo di arma.
Pa conclui: e sonido di e disparo mester resona awe rond mundo den seno di legislacionnan cu mester bolbe na e valor di hende ariba tur tereno y no solamente e terenonan cu por uza hende manera politica, organisacionnan local y mundial cu a wordo introduci pa defende e balor di hende cu manera historia a demostra, por wordo manipula cu e poder di flor!
Prensa como arma di Pueblo mester asegura cu e bienestar real ta triunfa!
