Turismo ta keda fungi como un entrada principal pa Aruba

Segun ATA

ORANJESTAD (AAN): Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba.

   A.T.A. ta pone hopi enfasis riba e e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posicionamento den líder di desaroyo di Aruba como un destinacion.

   E meta ta pa sigui mantene esfuerzonan den linea segun e balans menciona, y logra aumenta e entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A
   Volumen Stayover a crece: Mientras cu ta trahando riba e meta di un futuro mas balansa, Aruba ta sigui depende di e entrada economico abase di un producto madura. Te cu januari 2023, Aruba a ricibi un total di 98,786 bishitante “stayover”, esaki ta un crecemento di 18.4%, compara te cu januari 2023, unda a ricibi 117,172 bishitante “stayover”.

   Papiando di Tourism Credits: Na Aruba ta midi entrada, es decir e ‘calidad’ di bishitante’, na diferente manera. Entre otro locual bishitantenan ta dispuesto pa paga pa un anochi di estadia y entre otro pa medio di Tourism Credits registra pa Banco Central di Aruba. Den Q3 di 2023, Tourism Credits a aumenta cu 3% si compara e mesun periodo na 2022.

   Den e periodo di Q1 te cu Q3 di 2023, Tourism Credits a aumenta cu 15% si compara mesun periodo na 2022. Pronto A.T.A. lo ricibi estadistica defini pa por raporta ‘Tourism Credits’ di Q4 di 2023 compara cu Q4 di 2022. Den 2024 lo continua cu comparacion di cifranan di ‘Tourism Credit’ cu 2023.
   Mercadonan y categorianan di acomodacion: Den december 2024 80.4% di e total di e bishitantenan “stayover” pa Aruba a bishita for di Norte America, 5% a bishita for di Europa, 12.6% a bishita for di Latino America y 2% tabata procedente di otro partinan di mundo.

   Mirando e categorianan di acomodacion, den januari 2024 19.1% di bishitante a keda den hotelnan European Plan, 14.2% a keda den hotelnan All-Inclusive, 30.7% a keda den Timeshare y 36% a keda den otro tipo di acomodacion, conoci tambe como short-term vacation rentals (STVR).

   Short-Term vacation rentals: A.T.A. tin acceso na un plataforma unda por wak e cantidad di cas, apartamento y villas cu ta worde uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.
   Si compara januari 2024 cu december 2023 por wak cu e ocupacion averahe di e acomodacionnan aki a subi cu 10.2 punto di porcentahe, for di un averahe di 67.7% na januari 2023 pa un averahe di 77.9% na januari 2024.
   Den caso di entrada, si compara januari 2023 cu januari 2024 por wak cu e categoria a genera un crecemento den entrada di 51%. Si compara december 2023 cu december 2019 por wak cu e categoria a genera un crecemento den entrada di 228%.