Aruba tin su ‘Plan di Alivio pa Adultonan Mayor’ y nan famia

Plataforma permanente pa adultonan mayor

ORANJESTAD (AAN): Hopi no sa, pero na e momento aki tin un grupo di no menos cu 24 instancia local trahando hunto pa trece alivio pa nos adultonan mayor y nan famia.

   Minister Ursell Arends, di Ministerio di Asuntonan di Adulto Mayor y tur 24 instancia den e dialogo nacional permanente aki ta convenci cu Aruba por brinda un miho calidad di bida na nos grandinan. E nivel actual di calidad di bida di nos grandinan no ta adecuado. Aruba por organiza esaki miho. Pa logra esey a cuminsa desde october aña pasa cu un proyecto nacional.

   Meta ta pa comparti e fruta di tanto progreso di Aruba cu tur nos grandinan. Apesar di tanto progreso cu Aruba a conoce pa hopi aña, e calidad di bida di nos grandinan a keda atras. Tur hende ta di acuerdo cu un situacion asina no por sigui. Trahando hunto nos por cambia esaki y cambio ta necesario. Na october 2023, 24 instancia a scohe pa den un forma colectivo delinea, planea y coordina tur loke mester sosode pa trece un cambio positivo pa nos grandinan. Den e proyecto aki a reparti e 24 instancianan den 3 grupo di trabao tratando e temanan di enbehecimento activo, cuido na cas y cuido pa medio di un instancia. Cada grupo ta traha na identifica problema y propone solucion.

   Na principio di siman minister Arends di Asuntonan di Adulto Mayor a ricibi actualidad di e 3 ekipo. Aki por a constata cu e entusiasmo cu cual a cuminsa e proyecto aki pa yuda nos adultonan mayor no a cambia. E trabao di e plataforma permanente ta canando segun plan y cu gran sentido di responsabilidad.

   “Aruba por ta hopi orguyoso di su profesionalnan. Tur a sali pa duna un man y e biaha aki nan kier mira resultado concreto. Mescos cu mi nan tambe ta bisa cu den lachi no tin luga pa mas rapport. Ningun hende kier mas rapport. Nos mester un checklist, un punchcard, un mapa cu na un forma facil ta bisa nos kico pa haci pa move cos y trece cambio. Mi ta hopi contento cu nos tur ta pensa igual,” Minister Arends a menciona.

   Hopi trabao a worde haci desde e prome Foro Nacional pa Adulto Mayor cu a tuma luga 17-18 di october 2023. Hunto a yega na un inventario extenso di e temanan cu tin impacto negativo riba nos grandinan. Alavez y sin perde tempo e gruponan a cuminsa sondea tambe posibel solucionnan. Meta ta pa presenta solucion concreto y realistico y cu por worde ehecuta a corto plaso. 

   “Unico exigencia cu mi a pidi di nan ta pa presenta solucionnan concreto y realistico. E plataforma ta permanente hustamente pasobra ta nan mes lo percura pa monitor cu e solucionnan ta worde financia y ehecuta,” Minister Arends a enfatisa.

   Esaki ta un esfuerso nacional y e urgencia ta evidente. Riba hopi tema no por warda mas. Contrario na esfuersonan den pasado, e trabao di e Plataforma permanente pa Adultonan Mayor no ta caba cu e finalisacion di un rapport. Hunto nan tambe ta traha pa implementa e plan di alivio pa adultonan mayor y nan famia. Esfuerso colectivo, di henter nos comunidad, biniendo hunto den dialogo sano y abierto.

   “Den pasado esfuersonan aki a kibra pasobra tin tendencia di fragmenta. Esey ta ora un of otro instancia no por traha como parti di un colectivo y ta tuma un ruta independiente. Ora nan haci esey nan ta kibra e grupo y e grupo ta perde forsa. E biaha aki nos lo haci tur lo posibel pa enfatisa cu cambio ta posibel solamente ora nos traha hunto,” Minister Arends a remarca. E prome resultadonan di trabaonan di e plataforma permanente aki lo worde presenta na publico den e siguiente Foro Nacional pa Adulto Mayor, cual lo tuma lugar dia 26 di maart 2024.