Tur proyecto energetico cu bin riba e zona di refineria mester uza gas natural

Minister Glenbert Croes:

ORANJESTAD (AAN):  Pa locual ta e desaroyonan relaciona cu refineria, Minister Glenbert Croes Labor, Energia y Integracion a anuncia cu ta terminando algun recomendacion pa presenta na Gobierno di Aruba.

            Ta trata di proyectonan di industria energetico riba e zona conoci como e zona di e refineria.

            Minister Croes ta enfatisa cu tur operacion cu bin pa loke ta trata proyecto energetico riba e zona di refineria, mester bay uza gas natural, mescos cu WEB cu ta lagando HFO pa pasado y ta bay over pa gas.

            E vision di industria energetico y desaroyo di e zona di refineria ta encera diferente proyecto energetico cu ta parti di un vision total, por ehempel Eagle LNG. Tankinan cu ta na e sitio lo mester wordo renoba, lo uza cierto facilidadnan /unidanan di e refineria cu ta den bon condicion y lo bin proyectonan pa produci renewable bio-diesel cu por exporta pa Europa, pero tur esey por medio di tecnologianan moderno y den un zona hopi mas compacto.

            Minister Croes a sigui bisa cu Rodgers Beach y rond di e area aki lo wordo desaroya completamente. Tin cierto parti cu por wordo sanea, cambia, y desaroya pa atrae mas turista hotelero, condominium, y centro comercial.

            E vision ta pa tin dos caminda cu ta conecta cu Downtown San Nicolas cu lo ta centro di e siguiente ‘boom’ economico pa nos pais, Minister Croes a expresa. ‘Nos ta bay paso pa paso cu e desaroyo, pa asina sigura e exito cu kier.  Pasobra ta un oportunidad tin pa desaroya ful e zona na un forma responsabel y balansa. No manera antes cu desaroyonan tabata tuma luga ad hoc’.

             Pues lo tene cuenta cu e beneficio di loke ta bin no ta solamente pa San Nicolas, pero pa henter Aruba, protehando medio ambiente, percurando pa e beneficia Aruba economicamente, crea cupo di trabou y genera entrada pa Gobierno di Aruba.

            Terminando Minister Croes a enfatisa cu lo manda e recomendacionnan pa gobierno, pa hunto tuma decision riba e vision pa desaroyo di e area.

            Ta sigura cu kico cu bin, lo bay ta hopi mas miho cu loke tabata t’ey. Energia ta bay keda e curazon di e desaroyo di e industria riba zona di refineria.