Minister Xiomara Maduro:
*Necesidad financiero y deficit ta baha
ORANJESTAD (AAN): Durante un conferencia di prensa Diamars, Minister di Finanzas Xiomara Maduro a elabora riba e ‘Najaarsnota’ pa 2022.
E mandatario a indica cu normalmente den e ciclo presupuestario di pais Aruba despues cu e presupuesto a keda aproba pa Parlamento, tin cambionan ta tuma lugar den gobernacion.
“E cambionan aki tin cu wordo refleha den e presupuesto di e pais”.
Pesey bo ta haya cu fin di aña ta bin un presupuesto supletorio, pa asina por integra tur e cambionan aki pa nan por haya aprobacion tambe di Parlamento di Aruba, segun Maduro.
El a sigui bisa cu pa 2020, Gobierno tin diferente motibo pa acelera e proceso.
Segun e mandatario, Gobierno tin e conseho di CAft pa reduci e deficit ainda mas, pero tin tambe menazanan riba mesa, unda cu Aruba por haya un ‘aanwijzing’ si Hulanda haya cu Aruba no a tene cuenta cu e recomendacionnan.
“Di parti di Aruba nos a duna nos punto di bista riba esakinan cada vez, pero los di tur esaki tin cu sigui cu locual cu ta e ciclo presupuestario y pesey tambe en bista di tur locual cu ta pasando, nos ta acelera e parti aki, segun e minister.
El a sigui bisa cu e ley pa haci e cambionan necesario den e presupuesto dia 2022 ta bay keda finaliza, pa asina por bay na CAft pa por haya su conseho y pa despues tambe Raad van Advies pone su conseho riba e cambionan cu ta wordo proponi, pa despues Gobierno por wak kico ta e recomendacionnan y por atende cu esakinan, pa despues brinda esaki pa Parlamento.
Maduro a duna di conoce cu manera ta e custumber, Gobierno via e asina yama ‘Najaarsnota’ a adelanta caba riba e proceso, pa asina brinda na Parlamento e informacion di kico e cambionan ta encera.
“Awe e nota aki ta bay rumbo pa Parlamento pa por informa nan, sperando locual ta bay bira e ora ey e producto di ley mes y despues ta entrega e cambionan na Parlamento”, segun e mandatario.
El a bisa cu e cambionan mas importante ta den e gastonan di persona y servicio di producto, mientras cu e interes ta keda mescos.
“Impuesto directo ta bira un tiki mas, e impuesto indirecto tambe ta subi, e gastonan di inversion ta cambia y fianza pa estudio ta keda mesun cos”.
Locual ta importante ta cu e necesidad financiero tambe ta baha y e deficit ta baha, segun Maduro, kende a indica cu importante sigur ta pa baha e deficit, pasobra mas bo baha esaki, menos bo tin cu fia.
E mandatario a sigui bisa cu entrada ta bay subi cu 47.1 miyon florin, compara cu e presupuesto cu Parlamento a acorda na April di e aña aki.
Impuesto ta bay subi cu 27.8 miyon florin, e dividendo a subi cu 7 miyon florin (companianan estatal) y for di Hulanda via e landspakket a ricibi 4.1 miyon florin, pa cubri e proyectonan cu ta andando.
Maduro a indica tambe cu e cobranza riba e subsidio di salario ta wordo ahusta cu 500.000 florin, mientras cu Gobierno a ricibi un aporte di 100.000 florin for di Mondriaanfonds, pa yuda cubri gastonan pa locual ta mantencion na Museo Arqueologico.
El a indica tambe cu e asina yama ‘deviezenprovisie’ ta produci 8 miyon florin.
