Tur proceso a wordo activa durante e 'Caribe Wave 2023'  

Training pa tsunami organisa pa UNESCO a keda ehecuta

*BRA pendiente di resultado di evaluacion 

ORANJESTAD (AAN):  Rino Hermans di Bureau Rampenbestrijding Aruba (BRA) a ofrece diahuebs un resumen di loke tabata e training di tsunami cu a tuma lugar, e asina yama Caribe Wave 2023.

            El a indica cu pa 10:09 am Meteo A a manda un mensahe cu tin un 'tsunami warning' pa Aruba. Historia ta mustra cu pa 11:30 am e prome ola lo a yega Aruba c'un altura di 3 meter.

            Esaki ta un simulacro organisa pa UNESCO den region di Caribe. Tur isla den Caribe a train mescos y esaki ta un training realistico cu BRA tambe ta forma parti cu tambe ta sirbi pa evalua BRA su plan di maneho den un caso di tsunami, a splica.

            Pa 10:12 am a informa e partnernan y a spera cu den 20 minuut por a haya e prome team operacional pa asina haya sa ken tabata prepara y ken no, pa asina pa 11:30 am por a tin un bista di cuanto victima tin na Aruba y e estado di e isla, Hermans a señala.

            Despues di e pandemia, esaki ta e training di mas grandi cu a tuma lugar. UNESCO ta bezig ta monitor e actividad. Despues di esaki ta bay haya e resultado di UNESCO ora cu nan evalua y pa duna instruccion riba con Aruba tin cu sigui prepara. E obhetivo tabata pa haci esaki den un forma real solamente cu no tabata tin victima real.

            Segun Rino Hermans tur e proceso a wordo activa den henter region Caribe simultaneamente pasobra e mensahe a sali for di 'Pacific Warning Center' pa Meteo y di Meteo pa e 'Desaster Coordinators'.

            UNESCO ta tuma e cosnan aki hopi na serio pa motiva e hendenan pa prepara. Pa añanan ta calcula c'un dia Caribe ta bay haya un tsunami. Esaki ta nifica cu UNESCO tin un preocupacion cu ta pone cu mester actua como pais.

            E training tabata solamente durante 2 ora pero asina por haya sa kico ta e debilidadnan y unda ta fuerte. Den un caso asina ta calcula cu e victimanan ta rond di 42 mil pasobra no tin e ekiponan suficiente pa alerta e costa, e experto a indica.