Edward Maduro, vocero di Bloke Sindical:
ORANJESTAD (AAN) – E Bloke Sindical cu ta consisti di e sindicatonan SEPPA, SIMAR, SPA, y SADA, a yama un conferencia di prensa Diahuebs, pa actualiza informacion tocante e ultimo desaroyonan tocante e “Ley di prestatie management” (maneho di prestacion) cu ta hungando un rol fuerte y hopi preocupante, e dianan aki.
Edward Maduro, vocero di e bloke sindical, a hiba palabra y a referi na e accion sindical cu a tuma lugar siman pasa, unda nan a entrega un manifiesto na Premier Wever-Croes, pidiendo pa revoca e ley menciona, pa nan sinta na mesa, dialoga y haci e cambionan necesario pa e ley aki wordo carga pa e sindicatonan, mirando cu e no ta sirbiendo e intencion cu e mester tin, conforme ta stipula den e Landspakket.
E lider di SADA a bisa cu despues cu Diahuebs siman pasa, nan a entrega e manifiesto na prome minister, nan a un carta di e mandatario Diabierna, den cual el a skirbi “un par di cos” pero no a bisa mucho, y e pregunta si e ta hala e ley atras of no, e no a contesta.
Tambe el a manda un concepto di un Decreto Ministerial unda cu nan a forma e Comision Tecnico, pero despues di esey e sindicatonan a dicidi di contesta Prome Minister y Diadomingo 19 di Maart nan a manda un contesta na e dignatario, bisando cu loke el a skirbi den e carta di dia 17 no ta cuadra cu e manifiesto.
Djeynan, dia 20 di Maart, exactamente pa 4 or di atardi, Bloke Sindical a haya un contesta di Minister Presidente, riba cual nan a reacciona.
Edward Maduro a señala cu no ta solamente pa e ambtenaarnan cu e ley di maneho di prestacion ta conta pa nan, pero pa tur hende, ya cu e Bloke Sindical a mira cu Prome Minister a bin den un conferencia di prensa Dialuna tambe, bisando algun cos cu tampoco ta cuadra cu berdad.
Segun Maduro ta remarcable cu e carta di dia 20 di Maart di Minister Presidente ta bisa cu, entre otro, e prestatie management ta un Landaspakket Verplichting (obligatorio).
El a agrega cu contrario na loke e mandatario a bisa, ora e sindicatonan a entrega e manifiesto, gobierno tabata tin den plan pa bin cu un maneho di prestacion, pasobra hopi hende a bise pa “ordel” e trahado, pero pandemia a dal anto e momento ey e no a bisa cu ta un Landspakket Verplichting. Pero den su carta di 20 di Maart si, corectamente, el a bis’e y e ta hancra den e Landspakket, tema B.9.
Maduro a señala cu tin varios punto indica den e carta di Prome Minister unda e ta papia con e ley a bin na vigor, con el a wordo traha, y cu a tene cuenta cu tur hende y cu a sinta na mesa cu tur y cu e conseho di Raad van Advies.
