Tur cos ta cla pa evento di Kiwanis Young Professional Aruba 'Night of Glamour Summer Soiree'

ORANJESTAD (AAN): Kiwanis Young Professional Aruba a tene un conferencia di prensa pa anuncia nan evento pa recauda fondonan 'Night of Glamour Summer Soiree'

cu lo tuma lugar dia 4 di Juni, pa asina nan por sigui brinda mas na nos comunidad. 

Stephanie Daal, Presidente Kiwanis Young Professional Aruba a indica cu meta principal di nan organizacion ta pa haci obranan caritativo pa yuda comunidad di Aruba, cu un enfoke special riba muchanan. Un di nan proyecto principal ta 'Christmas in a Box', na unda nan ta recauda varios articulo pa muchanan den mas necesidad. Nan tambe ta organiza proyectonan manera 'Big Brother, Big Sister', Placa Chikito pa siña muchanan con pa spaar placa.

Daal a indica cu e proyectonan aki tin su gastonan y pa motibo aki, Kiwanis Young Professionals a dicidi di bolbe organiza un evento grandi pa recauda fondonan, e biaha aki, cu lo tuma lugar dia 4 di Juni. El a agrega cu despues di dos aña, pa motibo di e pandemia, nan a haya e oportunidad di haci un evento pa recauda fondonan pa por duna bek na comunidad.

'Night of Glamour Summer Soiree' lo tuma lugar na Hoya di 7'or di anochi te cu 12'or di anochi, cu entretenimento di Robert Jeand'or y su Solo Banda Show, Tsunami y DJ Vibes. E carchinan ta obtenible cerca nan miembronan, na Hoya of via Pay.aw.

Daal kier a probecha pa gradici tur compania cu ya caba a contribui pa e bon causa.

Janice Martinus di Hoya a bisa cu nan ta hopi contento di por forma parti di e evento di Kiwanis y a invita pueblo pa contribui na un bon causa.

Erwin Ras di Pay.aw di Setar a bisa cu nan ta yudando cu e parti di bendemento di carchi. Awendia tur cos ta birando digital y pesey usuarionan di pay.aw, por cumpra nan carchi usando 'one click away'.  Quiting Feng di Setar, a agrega cu nan ta hopi contento di, den un partnership cu Kiwanis Young Professional, por host e evento aki den nan aplicacion di pay.aw.

Feng a splica cu usando pay.aw ta un manera facil pa cumpra e carchinan pa e evento aki. Pa esnan cu no tin e app aki ainda, por baha esaki sea via Playstore of Apple store. Esaki ta completamente gratis. E ta disponible pa tur banco local.  

Kiwanis Young Professional Aruba kier invita comunidad pa bin disfruta di e 'Night of Glamour Summer Soiree' y alaves contribui na un bon causa.