Fundacion Mi Cutisa ta recauda fondo grandemente cu concierto bailable di banda Doble R

Hunto cu Robert Jeand’or y Papito Rafael

ORANJESTAD (AAN): Tabata Diaranson mainta cu na Museo di Cas Tan Tin na Pos Abao, a tuma lugar conferencia di prensa yama pa Fundacion Mi Cutisa, cu a anuncia un evento grandi cu nan ta preparando cu e meta pa recauda fondo.  Y esaki lo ta un fondo recauda pa yuda Museo Cas Tan Tin.

   E evento grandi ta den forma di un fiesta bailable grandi aki dos luna cu e inigualable grupo musical di tur tempo, esta Doble R di Curaçao, cu lo trece tur hende den ambiente estilo comeback pa goza di dje.

   Fundacion Mi Cutisa ya tin diessiete aña ta haciendo tur loke nan por pa promove desaroyo di arte, como tambe di cultura riba e isla di Aruba.  Algo grandi ta e hecho cu desde aña 2017, e Fundacion aki a haya bao di su hala tambe, e maneho di Museo Cas Tan Tin.

   A ser splica cu claramente tur esaki ta trece gastonan enorme pa e Fundacion, y pesey mes nan ta duna hopi balor na tur donacion y tambe yudanza cu por haya via di evento di recauda fondo.

   Pa tal motibo nan ta bin awor cu e mega evento aki cu ta bay haya e nomber di ‘Doble R Puru’.  Nan ta describi esaki como e ‘Concierto Bailable di Aña’, y lo ta consisti di Doble R di Curaçao, hunto cu Robert y su Solo Banda Show di Aruba, y Papito y su Nuevo Sabor di Aruba.

   E personahe Rignald Recordino tin pa casi 5 decada caba ta entretene amantenan di musica na Aruba cu su ritmo unico di Doble R.

   E grupo Robert y su Solo Banda Show tambe ta cumpli 30 aña di existencia awor na 2022.  Papito Rafael tambe ta conoci pa su gran exito y musica candente via di “Papito y su Nuevo Sabor”.

   E tres musiconan aki ta e legendarionan di islanan ABC cu a duna un contribucion significante den desaroyo di musica den e area aki.

   Segun Fundacion Mi Cutisa, nan a escoge pa haci un fundraising den forma di duna e pueblo di Aruba, e oportunidad pa disfruta un biaha mas di nos musica Antiano y pa bin balia na bo gusto den Aruba Entertainment Center, y esey lo ta riba un Diabierna 8 di Augustus 2022 pa 8:00 pm.