Ryan Maduro a splica:
ORANJESTAD (AAN): Reaccionando riba algun informacion cu a sali recientemente den algun medio di comunicacion, Director di Colegio EPI, Ryan Maduro a enfatisa cu EPI a scoge pa cera algun opleiding pa e prome aña. "Nos no a cera opleiding pa semper... nos no ta bay kita hende di trabao manera cu a wordo presenta den prensa".
El a subraya cu EPI a haci e escogencia di cera algun opleiding pa e prome aña locual kiermen cu den eerste jaar no ta tuma studiante nobo, pero 2de, 3de, 4de jaar ta sigui draai como afbouw jaar pa por renoba e opleidingnan aki y presenta nan bek na Augustus 2023.
E tres opleidingnan cu ta papiando di dje ta Apothekerassistent (Nivel 4, Bouwkunde Nivel 4 y Werktuigbouwkunde Nivel 4.
Maduro a duna di conoce cu entre e schooljaarnan 2017 te cu 2022, e averahe di studiantenan cu ta wordo tuma den e opleiding ta hopi abao y e rendimento den e opleidingnan aki tampoco no ta halto.
Pa loke ta Werktuigbouwkunde, a señala, ta logico pasobra no tin un refineria y mayoria di e trabaonan di Werktuigbouwkunde ta den un refineria y no tin'e. "Automaticamente e opleiding aki tabata grandi den pasado, pero aworaki el a bira hopi chikito pasobra no tin un necesidad di dje den e mercado".
Na e school-jaar 2021-2022, EPI a tuma 654 studiante y si mira cada un di nan ta representa menos cu 4% di e total cu EPI ta tuma pa aña den e tres opleidingnan aki, a señala.
Segun reglamento, no por forma un grupo si no ta yega na un minimo di 10 studiante. Si 5 studiante so a aplica, no por habri e grupo. Automaticamente e studiantenan aki lo wordo bisa pa haci un otro escogencia of pa warda un aña mas te ora cu haya e cantidad suficiente pa habri e opleiding, a agrega.
Aña pasa, solamente 7 studiante a gradua di Apothekerassistent, 8 a gradua di Bouwkunde y 4 di Werktuigbouwkunde.
Kico ta e strategia di Colegio EPI? Mirando e opcionnan cu tin, e ora a bisa cu ta bay cera algun opleiding den eerste jaar. Otro opleidingnan lo habri nobo mientras cu tin opleidingnan bieu cu a scoge pa draainan un biaha mas pa motibo cu e cantidad di studiantenan ta hopi halto y si para e opleidingnan ta trece un problematica pasobra ta bay haya cientos di studiante cu lo cay afo y cu lo keda sin opleiding, Maduro a splica.
E opleidingnan cu a cera en principio pa eerste jaar ta:
Administratie Nivel 4, Bouwkunde Nivel 4, Werktuigbouwkunde Nivel 4, Secretariaat Nivel 4 y Apothekerassistent Nivel 4.
Normalmente EPI a ofrece 14 opleiding y awor ta 13 opleiding. Tin deficit di un so compara cu e aña anterior, Ryan Maduro a indica.
Nan ta habriendo 22 grupo cu ta completamente nobo, cu studiantenan nobo cu ta yega na algo mas cu 500 studiante. Tras di cortina tin gruponan adicional cu ta di studiantenan cu a haal e prome aña, pero esey no ta hinca den e cantidad cu ta menciona pa publico, a bisa.
E target pa 2022-2023 ta pa tuma 572 studiante, e director di EPI a duna di conoce.
