Tunnel di Peaton ya a wordo tapa bek cu asfalt y trafico ta moviendo

ORANJESTAD (AAN): Aña pasa na comienzo di October, a cera un pida caminda net dilanti e proyecto di 330 camber di Hilton Embassy Suites cu ta bao construccion pariba di Irausquin Boulevard net pabao di Bubali Plas.  E caminda a

worde cera pa construi un “Tunnel di Peaton” cu ta yuda e huespednan di Embassy Suites por yega na otro banda di caminda, sin cu nan tin di bay cruza den trafico y asina haya acceso mas facil na beach.

   E trabao pa construccion di e Tunnel di Peaton a door di kibra e caminda di Boulevard, y traha buraco grandi eyden pa asina por bin baha e partinan di e Tunnel di concrete cu ta worde pre-fabrica eybanda mes.

   Pida-pida di concrete (e piso pega na e murayanan) a worde baha eynan pa asina por traha despues riba e dak di concrete, pa na final dera tur esaki back cu tera, y pone capa di asfalt back na halto pa asina trafico por sigui core.

   Y ya caba por mira cu esey a keda cla, y asfalt fresco ta poni pa asina trafico por sigui core bek.  E trabao pa finaliza e Tunnel ta sigui awor.  Algun hende tabatin e temor cu ora awa yobe hopi, cu e Tunnel por yena cu awa.  Pero esaki lo no ta asina.  E ingenieria hinca den e Tunnel aki, lo tin hopi medida di seguridad, pa evita cu e Tunnel aki lo por inunda den futuro, cu drain special poni na entrada cu por catch cualkier awa cu ta bay drenta eyden.

   E proyecto di Hilton Embassy Suites mes ta avanzando rapidamente, no obstante e retrazonan causa pa e pandemia.  Por a mira cu algun edificio ya a haya verf.  E ta planea pa keda cla mey-mey di 2021.