Cachonan por hole y detecta Covid-19 cu precision impresionante

ORANJESTAD (AAN): Un publicacion e fin di siman aki di Penn State University na Merca, a duna relato di un estudio den prueba di concepto dirigi pa e School of Veterinary Medicine, a mira con cacho por identifica muestranan positivo cu

96% di precision.

   Kico lo por yuda humanidad pa regresa bek na un bida “normal” unda bo por bay concierto, viaha, y acudi na encuentronan grandi, y toch mantene bo mes safe mey-mey di e riesgonan potencial cu tin pa salud publico?

   Un posibilidad segun un estudio nobo, ta cacho!  Un investigacion publica den fin di siman, a indica cu cachonan specialmente entrena por hole y identifica muestra positivo di Covid-19 cu 96% di precision.

   “Esaki no ta algo simple cu nos ta pidi cachonan pa haci,” ta loke Cynthia Otto a bisa, kende ta autor principal riba e estudio y director di University of Pennsylvania School of Veterinary Medicine Working Dog Center.  “Cachonan mester ta specifico ora di detecta e holor di e infeccion, pero tambe nan tin di generaliza a lo largo di holornan di background di diferente hende, esta homber y muher, adulto y mucha, hende di diferente geografica y etnico.”

   Den e prome estudio aki, e investigadornan a descubri cu cachonan por haci esey, pero e training mester wordo haci cu hopi cautela, y idealmente cu hopi muestra.  Loke nan a descubri ta wordo incorpora den un otro investigacion cu Cynthia Otto y coleganan a bautisa como ‘The T-Shirt Study”, den cual cachonan ta wordo entrena pa discrimina entre e holornan di Covid-positivo, Covid-negativo, y individuonan vacuna basa riba compuestonan organico volatil cu nan ta laga riba un T-shirt bisti henter anochi.

   “Nos ta recogiendo hopi mas muestra den e estudio aki, centenares of mas, compara cu loke nos a haci cu e prome estudio, y nos ta spera cu esaki lo trece e cachonan mas cerca di loke nan por topa cune ora cu nan ta den un area di comunidad,” segun Otto a indica.

   Pa medio di e Working Dog Center, Otto y su coleganan tabatin añanan largo di experiencia den training di cachonan cu por detecta asuntonan medico, incluyendo esnan cu por identifica cancer na ovario.  Ora cu pandemia di Covid-19 a yega, nan a usa e experiencia ey pa diseña un estudio pa detecta Coronavirus.

   Colaboradornan Ian Frank di Perelman School of Medicine y Audrey Odom John di Children’s Hospital of Philadelphia, a suministra muestranan positivo di SARS-CoV-2 di pashentnan adulto y pediatrico, como tambe muestranan di pashentnan cu a test negativo, pa sirbi como controlnan experimental.  Otto a traha estrechamente cu experto di Coronavirus, Susan Weiss di Penn Medicine pa procesa algun di e muestranan den e laboratorio di Biosafety Levl 2+ di Penn State, pa inactiva e virus pa asina nan por ta mas safe pa e cachonan hole.

   Nan a usa 8 Labrador Retrievers y un Belgian Malinois cualnan nunca a yega di haci trabao pa detecta medicina anteriormente.  Prome e investigadornan a entrena nan pa reconoce un holor diferente, un substancia sintetico conoci como “Universal Detection Compound” (UDC), y ora nan a bira bon den esey, a cuminza train nan pa hole muestra di urina di e pashentnan positivo di Covid-19, y asina nan a siña e diferencia di positivo y negativo.

   Despues di apenas 3 siman di training, tur 9 cacho por a identifica muestranan positivo di Covid-19 cu un precision promedio di 96%.  Tin biaha nan ta topa cu asuntonan sorprendente, esta cu tabatin un muestra di un pashent cu a test negativo pa Covid-19, pero cu recientemente a recupera di Coronavirus.  “E cachonan tabata sigui reacciona riba e muestra ey, y nos a keda bisa nan ‘no’,” Otto a bisa.  “Pero obviamente tabatin keto bay algo den e muestra ey cu e cachonan tabata detecta cu nan nanishi”.

   Loke e estudio aki a siña tur hende ta cu a confirma cu tin un holor di Covid-19 cu cachonan por detecta, y cu pa sigui training den futuro, mester bin cu cantidad mas grandi di diferente muestra, pa asina no permiti e cachonan sigui wordo entrena repetidamente cu e mesun muestra di un solo individuo.