Tuberianan na Pos Chikito a lek y causa derame di azeta diki

WEB Aruba NV a fix problema mesora

ORANJESTAD (AAN): Diasabra den oranan di mainta, habitantenan den area di Pos Chikito y tambe Spaans Lagoenweg y vecindario a cuminza sinti un holor masha desagradable mes den nan area.  E holor penetrante aki tabata pone varios habitante cera bentana, pero ya e holor a keda persisti den cas.

   Esnan cu ta biba den area di Betonicastraat na Pos Chikito ta esnan cu a sinti esaki aun mas, y nan mes a cuminza check rond ta di unda e holor ta bin.  E ta hole algo manera petroleo.

   Finalmente, den e gang di tuberia entre refineria na San Nicolas y WEB Aruba NV, cu tin net patras di Betonicastraat 5 y tambe Scobillostraat 14, habitantenan mes a bin descubri cu tin un derame di azeta na un di e tubonan aki.

   Na prome instante nan a yama Polis pa notifica di e asunto, y na su turno, Polis a yama esnan di WEB Aruba NV pa pone nan na altura di loke ta pasando.

   DIARIO a compronde cu mesora e profesionalnan di e sector di Mantencion di WEB Aruba NV a acudi na e area.  Ora cu a mira tur loke ta pasando, y cu e leak ta produci hopi azeta caba bashando den e pida pasiyo ey, a pone henter e maquinaria di asistencia funciona.  A core busca vehiculo pisa, a core busca santo, y personal cu ta encarga pa drecha lek di tuberia.

   Mientras cu a basha santo riba e pida tereno pa asina e absorba e azeta, e personal a sa di drecha e lek y evita cu e ta sigui cu e derame di azeta.

   E compania a indica cu te cu Diasabra atardi nan no sa exactamente kico a causa e lekmento aki, pero lo bay haci un investigacion.  Si acaso ta un problema, nan lo trata na remedia esaki, y preveni cu algo asina ripiti den futuro.

   No mester lubida cu decada pasa, tabatin un homber cu a hasta bay purba zaag net un pida tubo cu tin na Savaneta, pa purba horta esaki.  E tempo ey e persona ey a wordo gara door di autoridad.

   Kizas algo asina a bolbe socede den e area di Scobillostraat y Betonicastraat?  Esey ta algo cu un investigacion lo determina.

   Pero tanto WEB Aruba NV como tambe autoridad ta hopi contento cu bisiñanan a detecta y tuma accion rapido pa asina evita cu e derame a bira mucho mas grandi.

   Habitantenan a indica cu nan a haya nan mes obliga na haci esey, debi cu e holor di e azeta aki tabata insoportable, pio riba Diasabra cu casi no tabatin hopi biento.