DIARIO cu e lista di presentacion pa e drama den Parlamento

DIARIO cu prueba cu unicamente Mike y Mervin no a firma lista di presencia - *Despues falsificacion di voto awor ta wega politico na debate presupuesto - *Opinion publico ta cu Pueblo no mester paga miembronan cu no presenta

ORANJESTAD (AAN) — Hopi preocupacion ta reina na Aruba na momento cu formacion di un Gobierno nobo ta tuma luga, recuperacion ta avansa mientras mundialmente Covid-19 ta bolbe aumenta y Aruba cu alma y curpa ta trata na yega na un futuro nobo.

E situacion cu a presenta den sala di Parlamento Diabierna a bolbe duna indicacion cu no solamente wega infantil ta wordo hunga den sala di Parlamento pero cu intentonan ta wordo haci pa obstrui reconstruccion di Aruba.

Cu e termino pa atende cu e cifranan di 2021 pa Aruba a pasa, ta conoci na tur instancia incluso na Reino Hulandes cu no a actua manera por a spera ya cu CAFt, e comision di supervision Hulandes, ta wordo tene continuamente na haltura dor di Gobierno Wever-Croes cu na 2020 mester a adapta e cifranan prepara.

E reunion mester a habri caminda pa un discusion sano pero esaki atrobe no por tabata e caso.

E prome reunion di e constelacion nobo di Parlamento cu tin un base temporal te na momento cu formacion di Gobierno finalisa, a inclui wega di un persona desconoci cu a falsifica un voto cu e nomber di Benny y a haci mencion di reconteo riba e biyete falso di vota.

E segundo reunion mester a tuma luga Diabierna ora gran mayoria di e miembronan di Parlamento a firma e lista di presentacion cu awe DIARIO ta publica.

E lista di presentacion ta duna oportunidad pa papia durante e reunion.

Riba e lista aki por mira claramente cu e dos unico miembronan cu no a firma tabata Mike Eman y Mervin Wyatt-Ras, cu segun informantenan a bay papia cu un grupo di trahador di Gobierno cu tabata pafo.

E Presidente a cera e lista di presencia un poco prome cu hora pero e miembronan di Raiz a hala su atencion y el a bolbe habri e oportunidad pa inscribi pa asina tur hende por a hiba palabra.

Mike Eman y Mervin Wyatt-Ras a dicidi cu nan no ta firma e lista y no ta papia aunke nan a haya oportunidad pa firma e lista y pa asisti na e debate.

Informacion cu DIARIO a ricibi di publico cu a sigui e suceso ta, cu aparentemente Mike Eman lo a bay propaga cu  sconde e documento pa e no firma. Aparentemente tur su coleganan di partido a sabi di haya e documento cu el a considera cu a wordo scondi pa su persona pa asina el a crea un drama.

Nan a bandona e sala di reunion pa despues pafor di Parlamento Mike Eman duna informacion den cual e tabata haci como sifuera a trata di no laga AVP participa na e reunion dor di sconde e formulario cu manera awe DIARIO ta mustra a wordo firma pa casi tur miembro di AVP.

E reunion cu tabata un momento pa Aruba politico a debati riba cifranan di e pais, a continua.

Reaccionnan cu DIARIO a ricibi di parti di publico den fin di siman tabata indica cu durante cuatro aña Mike Eman a nenga di representa Aruba den Parlamento. For di momento cu el a habri su caminda pa eleccion, ta un problema tras di otro cu instancianan na Aruba cu ta trata di yega na un comprendemento nacional den e tempo di recuperacion cu a inicia y cu a surpasa expectativanan.

Di parti di publico a bini protesta pa loke AVP a haci y sugerencia a bini pa no paga miembronan di Parlamento pa e dia cu nan no tabata presente na reunion y laga esaki cuminsa ta e caso for di awor.