ORANJESTAD (AAN): Siman pasa e asina yama reunionnan cu Stakeholders cu Formador, algun biaha a dura oranan largo.
Formador Evelyn Wever-Croes mes a indica cu como 20 gremio/grupo a reuni cu nan pa asina suministra nan puntonan cu nan kier pa wordo ehecuta of bira un fruta den e siguiente gobernacion.
Lamentablemente debi na reunion di Parlamento riba Diabierna 23 di Juli pa trata Presupuesto, Formador no por a sigui cu reunion riba e dia ey.
Cuanto tempo mas e serie di reunionnan cu Stakeholders lo sigui? Formador Wever-Croes a splica cu ainda e no por duna un dia exacto cu esey lo finaliza.
Pero henter siman aki lo bay tin reunion cu Stakeholders, y tur ta depende con e schedule di Wever-Croes ta permiti. E ta calcula cu falta ainda como 30 pa 40 stakeholder pa reuni ainda cu nan.
“Cada dia nos ta haya mas peticion di hendenan cu kier pa nos reuni cu nan,” Wever-Croes a bisa. Pero esnan cu ta pidi reunion a base di éénpersoon si ta fastioso, como cu Formador ta prefera di haya grupo of organizacion, of fundacion pa bin dilanti.
Pues como cu e no por bisa cuanto dia mas falta, toch por mira cu por lo menos e siman aki keto bay e serie di reunion di stakeholders cu Formador lo bay sigui.
Awe Dialuna 26 di Juli lo tin reunion cu varios stakeholder den area di Economia, Turismo y Pensionado.
